बेकायदा थांब्यांमुळे महामार्गावर मृत्यूचा सापळा

खेड : पुणे-बेंगलोर महामार्गावरील खराब रस्त्यांची साडेसाती कमी म्हणून की काय म्हणून प्रवाशांनी आता ठिकठिकाणी बेकायदा थांबे निर्माण केले आहेत. या थांब्यांवर वाहन थांबवण्यासाठी सातारा परिसरातील बॉम्बे रेस्टॉरंंट व वाढे फाट्यावर प्रवाशांच्या जीवघेण्या कसरती सुरू आहेत. भल्या सकाळी व सायंकाळी प्रवासी वाहनांसाठी चक्कमार्गावरच ठाण मांडत असल्याने भीषण दुर्घटनेची भीती निर्माण झाली आहे. हे बेकायदा प्रवासी थांबे एखादेवेळेस जीवाला मुकायला लावणारे आहेत. या थांब्यांना व प्रवाशांना अटकाव कोण करणार? हा प्रश्न कायमच आहे.

बॉम्बे रेस्टॉरंट परिसरात उड्डाणपुलानजीक महामार्गावरून सातारा शहराकडे येणार्‍या मार्गावर कोल्हापूर, कराड तसेच पुणे-मुंबई बाजूकडे जाणारे प्रवासी महामार्गावरच खासगी वाहनांची प्रतीक्षा करत उभे असतात. या वाहनांना हात दाखविण्यासाठी प्रवासी निम्म्या मार्गावर येत असतात. प्रवाशांना घेण्यासाठी कंटेनर, टँकर, खासगी वाहने आणि एसटी बसही एकामागून एक थांबत असतात. त्यामुळे एक मार्ग वाहनांनेच अडवला जातो. महामार्गावरच वाहने थांबून प्रवाशांची चढ - उतार चालू असते. त्यामुळे ही ठिकाणे धोकादायक बनू लागली आहेत.