मतदानाचा टक्का वाढवण्यासाठी फुलंब्रीत मतदान जनजागृती मॅरेथॉन:मतदार राजा जागो हो, लोकशाहीचा धागा हो’चा जयघोष

फुलंब्री विधानसभा मतदारसंघात मतदान जनजागृतीसाठी जिल्हाधिकारी तथा जिल्हा निवडणूक अधिकारी दिलीप स्वामी, निवडणूक निर्णय अधिकारी ब्रिजेश पाटील, सहायक निवडणूक निर्णय अधिकारी कृष्णा कानगुले, सहायक निवडणूक निर्णय अधिकारी परेश चौधरी, स्वीप कक्षाच्या नोडल अधिकारी क्रांती धसवाडीकर यांच्या मार्गदर्शनाखाली मतदान जनजागृती मॅरेथॉन व मतदान शपथ शनिवारी घेण्यात आली. याप्रसंगी फुलंब्रीच्या कॉन्फिडन्स करिअर अकॅडमीच्या सर्व प्रशिक्षणार्थींनी उत्साहाने यात सहभाग घेतला. स्वीप सहायक जगन ढोके यांनी सर्व प्रशिक्षणार्थी विद्यार्थी व युवक यांना याप्रसंगी मतदानाची शपथ दिली. तसेच सर्वांना मतदानाच्या या उत्सवात सक्रियतेने सहभाग घेण्याचे आवाहन केले. ही मॅरॅथॉन फुलंब्री टी पॉइंट ते देवगिरी कारखाना मैदान इथपर्यंत आयोजित करण्यात आली होती. मतदार राजा जागा हो लोकशाहीचा धागा हो, माझे मत माझा अभिमान,आपले अमूल्य मत, करेल लोकशाही मजबूत इत्यादी घोषणा या वेळी देण्यात आल्या. मॅरेथॉनमध्ये अकॅडमीचे प्रशिक्षणार्थी विद्यार्थी तसेच युवकांनी मोठ्या उत्साहाने सहभाग घेतला. हा कार्यक्रम यशस्वी करण्यासाठी कॉन्फिडन्स करिअर अकॅडमीचे संचालक गणेश डिवरे, गणेश मुळे, देविदास तुपे, संतोष जाधव, काकासाहेब थोरात, योगेश निकम, नेमिनाथ दुधे यांनी परिश्रम घेतले. मॅरेथॉनमध्ये सहभागी असलेले विद्यार्थी व निवडणूक विभागाचे कर्मचारी.