महाराष्ट्राने देशाला सहकाराचा आदर्श घालून दिला:पोपटराव पवार यांचे प्रतिपादन, नागपूर ते शिर्डी निघालेल्या स्व. वैकुंठभाई मेहता सहकार दिंडीचे स्वागत‎

सहकार हा महाराष्ट्राचा कणा आहे. सामाजिक, आर्थिक विषमता दूर करण्याचे खूप मोठे काम सहकाराच्या माध्यमातून महाराष्ट्रात घडले. महाराष्ट्राने संपूर्ण देशाला सहकाराचा एक आदर्श निर्माण करुन दिला आहे. स्व. वैकुंठाबाई मेहता यांना सहकाराचे जनक मानतात. त्यांच्या विचारधारेने राजकीय, सामाजिक सहकाराची चळवळ उभी राहिली. दिंडी एक प्रेरणा आहे महात्मा गांधींनी दांडी यात्रेच्या माध्यमातून समाजात जनजागृती केली, त्याचप्रमाणे सहकार दिंडीमुळे जनजागृती होईल, असा विश्वास पद्मश्री पोपटराव पवार यांनी व्यक्त केला. नागपूर ते शिर्डी निघालेल्या स्व. वैकुंठभाई मेहता सहकार दिंडीचे माळीवाडा बसस्थानकात आगमन झाले असता, पवार यांच्या हस्ते दिंडीचे स्वागत करण्यात आले. राज्य फेडरेशनचे अध्यक्ष काकासाहेब कोयटे, राष्ट्रीय मल्टीस्टेट फेडरेशनचे अध्यक्ष सुरेश वाबळे, नाशिक विभागीय पतसंस्था फेडरेशनचे अध्यक्ष वसंत लोढा, जिल्हा उपनिबंधक गणेश पुरी, जिल्हा पतसंस्था फेडरेशनचे अध्यक्ष प्रशांत गायकवाड, तालुका फेडरेशनचे अध्यक्ष किसनराव लोटके, राजीव गांधी पतसंस्थेचे संस्थापक उद्धवराव दुसुंगे, मराठा सेवा पतसंस्थेचे व्हा. चेअरमन बाळासाहेब काळे, रेणुका माता पतसंस्थेचे प्रशांत भालेराव, महात्मा फुले पतसंस्थेचे शरद झोडगे, जैन ओसवालचे किरण भंडारी, मार्कंडेय सहकारी पतसंस्थेचे चेअरमन नारायण कोडम, नगर तालुका उपनिबंधक डॉ. शुभांगी गोंड, बाळकृष्ण काळे आदी उपस्थित होते. वसंत लोढा म्हणाले, की स्व. वैकुंठभाई मेहता सहकार दिंडीचे आगमन नागपूर येथून अहिल्यानगर येथे झाले आहे. महाराष्ट्रात पतसंस्था चळवळ रुजली आहे. पतसंस्थेबद्दलचा जनतेचा विश्वास वृद्धिंगत व्हावा, हा विचार घेऊन सहकार दिंडी संपूर्ण महाराष्ट्रातून जात आहे. या दिंडीचे अहिल्यानगर येथे मोठ्या उत्साहाने स्वागत करण्यात आले. आंतरराष्ट्रीय परिषदेच्या माध्यमातून पतसंस्था चळवळीला शासनाची बळकटी मिळावी, या हेतूने ९ फेब्रुवारी रोजी शिर्डी येथे आंतरराष्ट्रीय परिषद होत आहे. लेझीम पथक, सनई वादक, सहकार दिंडीचे चित्ररथ, तसेच राज्य पतसंस्था फेडरेशनचा आकर्षक चित्ररथ सहभागी झाला होता. दिंडीची सुरुवात छत्रपती शिवाजी महाराजांच्या पुतळ्यापासून झाली. त्यानंतर सहकार दिंडी ही माळीवाडा वेस, माणिक चौक, कापड बाजार, डाळ मंडई, आडते बाजार, बंगाल चौकी, मार्केट यार्ड येथे सहकार दिंडीचा समारोप झाला.