विविध प्रवासाच्या रंजक, खुसखुशीत कथांनी रंगले साहित्य अभिवाचन:अखिल भारतीय मराठी नाट्य परिषदेच्या संघाने मारली बाजी

प्रवास वर्णन, रंजक किस्से, खुसखुशीत लेखनातून साहित्य अभिवाचन स्पर्धा रंगली. साहित्य अभिवाचन स्पर्धेत अखिल भारतीय मराठी नाट्य परिषदेच्या संघाने मारली बाजी. त्यांच्या "प्रवास एका मेघाचा' संहिता प्रथम ठरली. "रंगगंध कलासक्त न्यास', चाळीसगाव ही संस्था गेली २२ वर्ष स्व. पुरुषोत्तम दारव्हेकर स्मृती प्रीत्यर्थ जागतिक अभिवाचन स्पर्धा आयोजित करत आहे. महाराष्ट्रातल्या २२ च्या वर जिल्ह्यांमध्ये ह्या स्पर्धेची प्राथमिक फेरी घेण्यात येते आणि त्यातले विजेते संघ हे अंतिम फेरीसाठी निवडले जातात. ह्या वर्षीही अखिल भारतीय मराठी नाट्य परिषद, मलकापूर, अकोला शाखा आणि प्रभात किड्स ह्यांच्या संयुक्त विद्यमाने ह्या स्पर्धेची प्राथमिक फेरी नुकतीच अकोला केंद्रावर पार पडली. स्पर्धेला भरघोस प्रतिसाद मिळाला. ११ संघांनी स्पर्धेत भाग घेतला. मलकापूर, अकोला शाखेच्या "मेघ प्रहसन : प्रवास एका मेघाचा' ह्या संहितेला प्रथम क्रमांक पटकावला. त्यात कालिदास यांनी लिहिलेल्या काव्यात रामटेक ते अल्कानगरी मेघाचा प्रवासाचे सुंदर वर्णन करण्यात आले. निसर्गसौदर्यांची भूरळ संहितेने घातली. "प्रवास एका मेघाचा' या संहितेचे लेखन, दिग्दर्शन डॉ. सुमेधा हर्षे ह्यांचे होते आणि अभिवाचक डॉ. शिरीन देशमुख आणि डॉ. सुमेधा हर्षे यांनी केले. स्व. शांताराम जैन स्मृती प्रतिष्ठान संघाला द्वितीय पुरस्कार प्राप्त झाला. "सेकंड इनिंग' ह्या विनोदी कथेचे लेखक-दिग्दर्शक भालचंद्र उखळकर आणि अभिवाचक डॉ. राहुल देशमुख, आनंद जागीरदार, नाना भडके, भडके आणि मनीषा कुलकर्णी यांनी केले. सेकंड इनिंगमध्ये दोघांना पुन्हा एकमेकांना साथ देण्याची संधी मिळते. पण समाज काय म्हणेल? या विचारातून दोघेही माघार घेतात. यावेळी कुटुंबीय पुढे येऊन त्यांना साथ देते. संहितेची खुसखुशीत मांडणी व लिखाण रंजक होते. स्पर्धेत ९ अभिवाचकांना उत्कृष्ट वाचक अभिनयाचा पुरस्कारही देण्यात आला. ज्येष्ठ रंगकर्मी, प्रसिद्ध सिने कलावंत गणेश देशमुख परीक्षक होते. या स्पर्धेचे उद्घाटन ज्येष्ठ नाट्यकर्मी अरुण घाटोळे होते तर बक्षीस वितरण समारंभाला प्रभात किड्स स्कूलचे संचालक, संस्थापक गजानन नारे आणि ज्येष्ठ रंगकर्मी अशोक ढेरे उपस्थित होते. "अकोट जर्नी विथ शेवंता आजी' ने हसवले सीताबाई कला व वाणिज्य महाविद्यालयाचे डॉ. प्रा. नाना भडके लिखित "अकोट जर्नी विथ शेवंता आजी' संहितेच्या अभिवाचनाने रसिकांना खळखळून हसवले. अकोला ते अकोट बस प्रवासात शेवंता आजीचे मजेशीर किस्से मनोरंजक व तेवढेच मार्मिक होते. विष्णू निंबाळकर यांचे दिग्दर्शन, तर विष्णू निंबाळकर, श्रुती कसबेकर, आशा खोकले व संजय भगत कलावंताने यात सहभाग घेतला.