13 वरिष्ठ सनदी अधिकाऱ्यांच्या बदल्या, प्रवीण दराडे सहकार विभागात

सरकारकडून सनदी अधिकाऱ्यांच्या बदल्यांचे सत्र सुरूच असून आज 13  सनदी अधिकाऱ्यांच्या बदल्या करण्यात आल्या. पर्यावरण विभागातून बदली झाल्यापासून नियुक्तीच्या प्रतीक्षेत असलेले ज्येष्ठ सनदी अधिकारी प्रवीण दराडे यांची बदली सहकार आणि पणन विभागात प्रधान सचिव म्हणून केली आहे.

पंकज कुमार यांची नियुक्ती सामान्य प्रशासन विभागात सचिव आणि विशेष चौकशी अधिकारी 2 म्हणून करण्यात आली आहे. नितीन पाटील यांची बदली नवी मुंबईत कौशल्य विकास विभाग आयुक्तपदी तर राज्यपालांच्या सचिव श्वेता सिंघल यांची बदली अमरावती विभागीय आयुक्तपदी करण्यात आली असून डॉ. प्रशांत नारनवरे यांची बदली राज्यपालांचे सचिव म्हणून झाली आहे.

अनिल भंडारी माहिती-तंत्रज्ञान विभागाचे  संचालक, पी. के. डांगे राज्य मानवी हक्क आयोगाचे सचिव, एस. राममूर्ती राज्यपालांचे उपसचिव, अभिजित राऊत राज्य कर सहआयुक्त छत्रपती संभाजीनगर, मिलिंदकुमार साळवे अल्पसंख्याक विकास आयुक्त छत्रपती संभाजीनगर, अमित रंजन पांढरकवडा प्रकल्प अधिकारी, एकात्मिक आदिवासी विकास प्रकल्प या पदावर नियुक्ती करण्यात आली आहे.

सिडकोचे सहव्यवस्थापकीय संचालक राहुल कर्डिले यांची बदली नांदेडचे जिल्हाधिकारी म्हणून तर कल्याण-डोंबिवली स्मार्ट सिटी प्रकल्पाच्या मुख्य कार्यकारी अधिकारी माधवी सरदेशमुख यांची बदली व्यावसायिक शिक्षण आणि प्रशिक्षण विभागाच्या संचालकपदी झाली आहे.