ابھینو تھیٹر میں نایاب نوادرات کی نمائش کا افتتاح

عظمیٰ نیوزسروس

جموں//چیف سکریٹری اتل ڈلو نےجموں و کشمیر کو متنوع ثقافتوں اور روایات کا مسکن قرار دیا ہے جس میں منفرد اور شاندار نوادرات اور تخلیقات ہیں جوکثرت میں اتحاد کی علامت ہیں۔اتل ڈلو نے یہ بات ابھینو تھیٹر میں عالمی یوم ورثہ کے موقع پر کلا کیندر سوسائٹی جموں کے زیر اہتمام تاریخی اور ثقافتی اہمیت کے حامل 500سے زیادہ شاندار نوادرات کی ایک خصوصی ورثہ نمائش کی افتتاحی تقریب سے خطاب کرتے ہوئے کہی۔چیف سکریٹری نے اس موقع پر بات کرتے ہوئے نوجوان نسل پر زور دیا کہ وہ اپنے علاقے کے عجائب گھروں اور یادگاروں کا دورہ کریں تاکہ ہماری تاریخی میراث اور ثقافتی امتزاج کے بارے میں جان سکیں۔ انہوں نے کہا کہ جموں و کشمیر کی نایاب اور غیر معمولی طور پر پرفتن ثقافت اور ورثے کے علاوہ اس کی شاندار قدرتی شان پوری دنیا کو مسحور کرتی ہے۔ اس نعمت کو یہاں سیاحت کی صنعت کو فروغ دینے کے لیے متعدد طریقوں سے استعمال کیا جا سکتا ہے اس طرح یوٹی کی اقتصادیات میں زبردست اضافہ ہو گا۔ڈلو نے کہا کہ اس نمائش کو پرائیویٹ کلکٹرز کو ایک پلیٹ فارم فراہم کرنے کے لیے ڈیزائن کیا گیا ہے جو ثقافتی اہمیت کی چیزوں کو محفوظ کرنے کے لیے وقف ہیں۔ انہوں نے جموں و کشمیر کی ثقافتی وراثت کے تحفظ کے لیے اپنی وابستگی کا اعادہ کیا جبکہ یو ٹی کی ثقافتی وراثت کے احیاء، بحالی اور تحفظ کے لیے لاگو کی جانے والی اسکیم کی وضاحت کی۔حصہ لینے والے کلکٹرز اور کیوریٹروں میں سریش ابرول، ڈائریکٹر شاہوت آرٹ گیلری، جموں، اندر سنگھ، ڈائریکٹر ہمالین ہیریٹیج میوزیم اور انیل پاڈا، جو امر سنتوش میوزیم اور آرٹ گیلری، ادھم پور کی نمائندگی کررہے تھے۔نمائش کے اہم پرکشش مقامات میں کشمیر سکول آف پینٹنگز کی نایاب نمائشیں، قدیم تانبے کے برتن، برچ چھال (بھوجپترا) پر کندہ نسخے، راجترنگینی کا اصل متن، ایک قدیم تاریخی تاریخ، کشان، ڈوگرہ، سکھ اور برطانوی ادوار کے سکے شامل تھے۔