अफजलखानाचा कोथळा काढलेली वाघनखे नागपूरला रवाना:साताऱ्यात चार लाख शिवप्रेमींनी घेतले दर्शन

ऐतिहासिक प्रतापगडाच्या पायथ्याशी अफजलखानाचा कोथळा काढलेली छत्रपती शिवाजी महाराजांची वाघनखे गेली सात महिने साताऱ्यातील संग्रहालयात पाहण्यासाठी ठेवण्यात आली होती. वाघनखांचा साताऱ्यातील मुक्काम संपला असून रविवारी (2 फेब्रुवारी) नागपुरच्या मध्यवर्ती संग्रहालयाकडे रवाना झाली. अफजलखानाचा कोथळा काढलेली छत्रपती शिवाजी महाराजांची ऐतिहासिक वाघनखे लंडनमधील व्हिक्टोरिया अँड अल्बर्ट म्युझियममधून भारतात आणण्यात आली होती. नागरीकांना पाहता यावीत म्हणून १९ जुलै २०२४ पासून ती साताऱ्यातील छत्रपती शिवाजी महाराज संग्रहालयात ठेवण्यात आली होती. तेव्हापासून सुमारे चार लाख शिवप्रेमींनी वाघनखांचं दर्शन घेतलं. साताऱ्यातील संग्रहालयातून वाघनखे रविवारी दुपारी नागपूरच्या मध्यवर्ती संग्रहालयाकडे रवाना झाली. यावेळी व्हिक्टोरिया अँड अल्बर्ट म्युझियमचे ब्रिटिश अधिकारी आणि पुरातत्त्व विभागाचे विशेष पथक उपस्थित होते. वाघनखांचा ऐतिहासिक हस्तांतरण सोहळा यावेळी पार पडला. वाघनखांच्या सुरक्षेसाठी विशेष बंदोबस्त देण्यात आला आहे. साताऱ्यातील वाघनखांचे प्रदर्शन संपले आहे. आता पुढील सात महिने नागपुरातील शिवप्रेमींना वाघनखे पाहता येतील. पुरातत्व विभागाच्या नियोजनानुसार ३ ऑक्टोबर २०२५ ते ३ मे २०२६ पर्यंत कोल्हापूर येथील संग्रहालयात ही वाघनखे ठेवली जाणार आहेत. साताऱ्यात वाघनखे आणल्यानंतर देश-विदेशातील चार लाख नागरिकांनी संग्रहालयाला भेट दिली. यामध्ये अभिनेता रितेश देशमुखसारख्या अनेक सेलिब्रिटींचा समावेश होता. शाळकरी मुलांसाठी खास दिवस राखीव ठेवण्यात आला होता. वाघनखे साताऱ्यात आणल्यानंतर वाघनखांची जंगी मिरवणूक काढण्यात आली होती.