आदिवासी विकास मंत्र्यांचा मनमोकळा संवाद:शिवाजी शिक्षण संस्थेत 32 वर्षांची सेवा, डॉ. अशोक उईके यांचा विशेष सत्कार

महाराष्ट्राचे आदिवासी विकास मंत्री प्राचार्य डॉ. अशोक उईके यांचा श्री शिवाजी शिक्षण संस्थेतर्फे सोमवारी विशेष सत्कार करण्यात आला. मातोश्री विमलाबाई देशमुख सभागृहात आयोजित या कार्यक्रमात संस्थेचे अध्यक्ष हर्षवर्धन देशमुख यांच्या अध्यक्षतेखाली हा सोहळा पार पडला. सत्कार समारंभात बोलताना डॉ. उईके यांनी संस्थेशी असलेले त्यांचे जिव्हाळ्याचे नाते व्यक्त केले. त्यांनी सांगितले की, "भाऊसाहेबांनी लावलेल्या वटवृक्षाच्या छायेत मी मोठा झालो. या संस्थेने मला घडवले आणि माझ्या यशाचे संपूर्ण श्रेय संस्थेलाच जाते." ३२ वर्षांपूर्वी प्राध्यापक म्हणून पहिली नियुक्ती झाल्यापासून सेवानिवृत्तीपर्यंत संस्थेत काम करण्याचा शब्द त्यांनी तत्कालीन अध्यक्ष दादासाहेब काळमेघ यांना दिला होता, जो त्यांनी पाळला. कार्यक्रमात संस्थेचे उपाध्यक्ष अॅड. गजाननराव पुंडकर, अॅड. जे.व्ही. पाटील पुसदेकर, कोषाध्यक्ष दिलीपबाबू इंगोले यांच्यासह अनेक मान्यवर उपस्थित होते. संस्थेचे सचिव डॉ. वि.गो. ठाकरे यांनी स्वागत व प्रास्ताविक केले. मंत्री उईके यांचा शाल, श्रीफळ, स्मृतिचिन्ह, दैनंदिनी व शिवसंस्था मासिकाच्या अंकाने गौरव करण्यात आला. अध्यक्ष हर्षवर्धन देशमुख यांनी या सत्काराचे औचित्य सांगताना म्हटले की, "आपल्यातल्या मोठ्या झालेल्या माणसाचे मोठेपण स्वीकारून त्यांचे कौतुक करणे हा या सोहळ्याचा मुख्य उद्देश आहे." डॉ. राजेश मिरगे यांनी कार्यक्रमाचे सूत्रसंचालन केले, तर प्राचार्य डॉ. अंबादास कुलट यांनी आभार मानले. कार्यक्रमाला संस्थेचे आजीव सदस्य, माजी-वर्तमान प्राचार्य, शिक्षक आणि कर्मचारी मोठ्या संख्येने उपस्थित होते.