आळंदीतील वारकरी शिक्षण संस्थांमध्ये लैंगिक शोषणाच्या तक्रारी:महिला आयोगाच्या अध्यक्षांचे अनधिकृत संस्थांवर 48 तासांत कारवाईचे आदेश

राज्य महिला आयोगाच्या अध्यक्षा रूपाली चाकणकर यांनी आळंदीतील अनधिकृत वारकरी शिक्षण संस्थांमधील गंभीर गैरप्रकारांवर कडक भूमिका घेतली आहे. विद्यार्थी वसतीगृहांमध्ये होणाऱ्या बालकांच्या लैंगिक शोषणाच्या तक्रारींच्या पार्श्वभूमीवर त्यांनी सोमवारी पोलीस तपासाचा आढावा घेतला. चाकणकर यांनी दिलेल्या निर्देशांनुसार, पोलिसांनी दाखल गुन्ह्यांचा तातडीने तपास करावा आणि अशा घटनांमध्ये मुलांना विश्वासात घेऊन अधिक प्रकरणे उघडकीस आणावीत. शासनाच्या महिला व बालविकास विभागाच्या नियमावलीचे उल्लंघन करणाऱ्या संस्थांचा अहवाल सात दिवसात सादर करण्याचे आदेश देण्यात आले आहेत. वसतीगृहांसाठी महत्त्वाच्या नियमांमध्ये मुला-मुलींची स्वतंत्र निवास व्यवस्था, पुरेसे कर्मचारी, स्वतंत्र अभ्यासिका, आवश्यक स्नानगृहे व स्वच्छतागृहे यांचा समावेश आहे. संस्था चालवण्यासाठी जिल्हा महिला व बालविकास विभागाची परवानगी आणि धर्मादाय आयुक्त कार्यालयाची नोंदणी अनिवार्य आहे. स्थानिक पातळीवर पोलीस, महिला व बाल विकास, महसूल, नगरपालिका, शिक्षण विभाग आणि ग्रामस्थांची एक समिती स्थापन करण्यात येणार असून, ही समिती नियमित तपासणी करून शिक्षण विभागाला अहवाल सादर करेल. चाकणकर यांनी आळंदीतील ग्रामस्थांशी संवाद साधून त्यांच्या तक्रारी ऐकून घेतल्या आणि विविध संस्थांना भेटी देऊन विद्यार्थ्यांच्या सुविधांची पाहणी केली.