गडचिरोलीत मोठी यश: चार जहाल माओवाद्यांचे आत्मसमर्पण:एका विभागीय कमिटी सदस्यासह तीन माओवाद्यांनी टाकले शस्त्र, 28 लाखांचे बक्षीस जाहीर

गडचिरोली जिल्ह्यात पोलिसांना मोठे यश मिळाले आहे. एक विभागीय कमिटी सदस्य, एक एरिया कमिटी सदस्य आणि दोन सक्रिय सदस्यांसह चार जहाल माओवाद्यांनी पोलिसांसमोर आत्मसमर्पण केले आहे. या आत्मसमर्पणामुळे नक्षल चळवळीला मोठा धक्का बसला आहे. आत्मसमर्पण करणाऱ्यांमध्ये अशोक पोच्या सडमेक उर्फ बालन्ना, वनीता दोहे झोरे, साधू लिंगु मोहंदा उर्फ शैलेश आणि मुन्नी पोदीया कोरसा यांचा समावेश आहे. यापैकी अशोक हा १९९१ पासून माओवादी चळवळीत सक्रिय होता आणि त्याच्यावर ८२ गंभीर गुन्हे दाखल आहेत. महाराष्ट्र शासनाने त्याच्यासाठी १६ लाख रुपयांचे बक्षीस जाहीर केले होते. २००५ पासून सुरू असलेल्या शासनाच्या आत्मसमर्पण योजनेमुळे आतापर्यंत गडचिरोली पोलीस दलासमोर ६९५ माओवाद्यांनी शरणागती पत्करली आहे. या चौघांनी आत्मसमर्पण करण्यामागे अनेक कारणे आहेत. पोलिसांच्या कडक कारवाया, जंगलात वाढलेले दबाव, महिलांना दिली जाणारी भेदभावपूर्ण वागणूक आणि वरिष्ठ माओवाद्यांकडून होणारा पैशांचा गैरवापर ही प्रमुख कारणे आहेत. पोलीस महानिरीक्षक संदीप पाटील, उप-महानिरीक्षक अंकित गोयल, सीआरपीएफचे उप-महानिरीक्षक अजय कुमार शर्मा, पोलीस अधीक्षक नीलोत्पल आणि सीआरपीएफच्या ९ व्या बटालियनचे कमांडंट शंभु कुमार यांच्या मार्गदर्शनाखाली ही कारवाई यशस्वी झाली. शासनाने आत्मसमर्पण केलेल्या चारही माओवाद्यांसाठी एकूण २८ लाख रुपयांचे बक्षीस जाहीर केले होते.