कोंडबावीच्या यादव दाम्पत्याला राज्यस्तर आदर्श माता-पिता पुरस्कार:पुण्याच्या सुसंवाद फाउंडेशनच्या वतीने राज्यातील 29 दाम्पत्यांचा सन्मान

पुण्यातील सुसंवाद फाऊंडेशनच्या वतीने आयोजित केलेल्या राज्यस्तरीय आदर्श माता-पिता पुरस्कार सोहळ्यात कोंडबावी (ता. माळशिरस) येथील लतिका व दत्तू यादव या दांपत्यास महाराष्ट्र साहित्य परिषदेचे कार्याध्यक्ष प्रा. मिलिंद जोशी यांच्या हस्ते गौरवण्यात आले आहे. पुणे येथील या फाउंडेशनच्या वतीने महाराष्ट्रातील विविध क्षेत्रात यशस्‍वी असलेल्या २९ नामवंत व्यक्‍तींच्या आई-वडिलांचा राज्यस्‍तरीय आदर्श माता-पिता पुरस्‍कार देऊन सन्‍मानित करण्यात आले. पुण्यात शनिवारी एस. एम. जोशी सभागृहात हा कार्यक्रम झाला. या वेळी उद्योजक राहुल भोसले, प्रकाश चव्हाण, सुधाकर न्हाळदे, संगीता न्हाळदे, विश्‍वस्‍त धोंडीराम गडदे आदी उपस्थित होते. आई-वडील संस्कारपीठ, त्यांचा आदर करणे गरजेचे प्रा. मिलिंद जोशी म्हणाले, आई-वडील हे मोठे संस्‍कारपीठ असले तरी आजच्या एकाच अपत्याच्या काळात कुटुंबामध्ये प्रेम आणि अपेक्षा यांचा कडेलोट झाल्याचे दिसून येते. प्रायव्हसीच्या नावाखाली अगदी मुलांच्या खोलीत प्रवेश करताना दार वाजवून मुलांना भेटावे लागते. सकारार्थी माता-पित्यांची मुले यशस्‍वी होतात, ती समृद्ध होतात.