क्रीडा विद्यापीठ, ‘एचव्हीपीएम’च्या विकासास चालना देऊ- बावनकुळे:पालकमंत्र्यांची हव्याप्रमंला भेट; पद्मश्री प्रभाकरराव वैद्य यांनी केले स्वागत‎

देशातील पहिले क्रीडा विद्यापीठ व श्री हनुमान व्यायाम प्रसारक मंडळाच्या विकासाला चालना देण्याची ग्वाही राज्याचे महसूल मंत्री तथा पालकमंत्री चंद्रशेखर बावनकुळे यांनी एचव्हीपीएमला नुकत्याच दिलेल्या भेट प्रसंगी दिली. पालकमंत्री पदाची जबाबदारी मिळाल्यानंतर बावनकुळे यांनी अंबादेवी, एकवीरा देवीच्या मंदिरात जाऊन दर्शन घेतले. त्यानंतर त्यांनी एचव्हीपीएमला भेट दिली. या वेळी मंडळाचे उपाध्यक्ष डॉ. श्रीकांत चेंडके व सचिव डॉ. माधुरी चेंडके यांनी बावनकुळे यांना मंडळाद्वारे सुरू असलेल्या शैक्षणिक व क्रीडा कार्याची माहिती दिली. प्रभाकरराव वैद्य व हव्याप्रमंच्या कार्याची माहिती असून त्यांची भेट घेण्यासाठी आवर्जून आलो आहोत. शासनाने मंडळाला क्रीडा विद्यापीठ घोषित केले असून, ते तातडीने कार्यान्वित करणे तसेच इतर मोठे उपक्रम मंडळात सुरू करून मंडळाच्या विकासातून जिल्ह्याच्या विकासाला आपला भर राहील, असे आश्वासन पालकमंत्र्यांनी दिले. पालकमंत्री बावनकुळे यांचे स्वागत मंडळाचे उपाध्यक्ष डॉ. श्रीकांत चेंडके, सचिव डॉ. माधुरी चेंडके, कार्याध्यक्ष डॉ. प्रशांत देशपांडे, कोषाध्यक्ष डॉ. श्रीनिवास देशपांडे, सचिव प्रा. रवींद्र खांडेकर, डॉ. विकास कोळेश्वर, डॉ. किशोर फुले, डॉ. संजय तीरथकर, प्रा. दीपा कान्हेगावकर, प्रा. प्रणव चेंडके यांच्यासह सर्व पदाधिकारी यांनी केले. या वेळी बावनकुळे यांनी मंडळातील राष्ट्रीय व आंतरराष्ट्रीय स्तरावर यशस्वी विद्यार्थ्यांशी संवाद साधत त्यांचे कौतुक केले. प्रधान सचिवांच्या निवासस्थानी बावनकुळे यांचा वैद्य यांनी शाल, श्रीफळ व स्मृतिचिन्ह देत सत्कार केला. पालकमंत्र्यांनी एचव्हीपीएम येथे तासाभरात मंडळातील अनेक वैशिष्ट्यपूर्ण बाबींची माहिती घेतली. सोबतच मंडळात स्वातंत्र्यपूर्व काळापासून ते आजवर कोणकोणत्या महान विभूती येऊन गेल्या याचीही त्यांना माहिती देण्यात आली. एचव्हीपीएमच्या प्रांगणात भारतीय पारंपरिक खेळांचे स्थायी स्वरूपात संग्रहालय निर्माण करावे अशी मागणी उपाध्यक्ष डॉ. श्रीकांत , सचिव डॉ. माधुरी चेंडके व कोषाध्यक्ष डॉ. निवास देशपांडे यांनी निवेदनाद्वारे केली. यामुळे युवा पिढीला भारतीय पारंपरिक खेळांचे व संस्कृतीचे ज्ञान मिळून देश, समाजाला एक सशक्त पिढी मिळेल. सोबतच या संग्रहालयाद्वारे देशाच्या खेलो इंडिया अभियानाला बळ मिळेल. या निवेदनाचा स्वीकार करत एचव्हीपीएमच्या विकासाला चालना देऊ अशी ग्वाही बावनकुळे यांनी दिली. भारतीय पारंपरिक खेळांच्या स्थायी संग्रहालयाची मागणी