छत्रपती शिवाजी महाराजांची वाघनखे नागपूरला रवाना:साताऱ्यामध्ये 7 महिन्यांत 4 लाख जणांनी घेतले दर्शन

ऐतिहासिक प्रतापगडाच्या पायथ्याशी अफजल खानाचा कोथळा काढलेली छत्रपती शिवाजी महाराजांची वाघनखे गेल्या सात महिन्यांपासून साताऱ्यातील संग्रहालयात पाहण्यासाठी ठेवण्यात आली होती. वाघनखांचा साताऱ्यातील मुक्काम संपला असून रविवारी (२ फेब्रुवारी) नागपूरच्या मध्यवर्ती संग्रहालयाकडे रवाना झाली आहेत. अफजल खानाचा कोथळा काढलेली छत्रपती शिवाजी महाराजांची ऐतिहासिक वाघनखे लंडनमधील व्हिक्टोरिया अँड अल्बर्ट म्युझियममधून भारतात आणण्यात आली होती. नागरिकांना पाहता यावीत म्हणून १९ जुलै २०२४ पासून ती साताऱ्यातील छत्रपती शिवाजी महाराज संग्रहालयात ठेवण्यात आली होती. तेव्हापासून सुमारे चार लाख शिवप्रेमींनी वाघनखांचे दर्शन घेतले. साताऱ्यातील संग्रहालयातून वाघनखे रविवारी दुपारी नागपूरच्या मध्यवर्ती संग्रहालयाकडे रवाना झाली. या वेळी व्हिक्टोरिया अँड अल्बर्ट म्युझियमचे ब्रिटिश अधिकारी आणि पुरातत्त्व विभागाचे विशेष पथक उपस्थित होते. वाघनखांचा ऐतिहासिक हस्तांतरण सोहळा या वेळी पार पडला. वाघनखांच्या सुरक्षेसाठी विशेष बंदोबस्त देण्यात आला आहे. ३ ऑक्टोबर रोजी दाखल होणार कोल्हापूरमध्ये आता पुढील सात महिने नागपुरातील शिवप्रेमींना वाघनखे पाहता येतील. पुरातत्त्व विभागाच्या नियोजनानुसार ३ ऑक्टोबर २०२५ ते ३ मे २०२६ पर्यंत कोल्हापूर येथील संग्रहालयात ही वाघनखे ठेवली जाणार आहेत. साताऱ्यात वाघनखे आणल्यानंतर देश-विदेशातील चार लाख नागरिकांनी संग्रहालयाला भेट दिल्याचे सांगण्यात आले आहे.