टाळमृदंगाच्या गजरात शेगाव पायदळ पालखी झाली रवाना:बोरगाव मंजूच्या जय बजरंग हरिपाठ मंडळाची धार्मिक उत्सव

टाळमृदंगाच्या गजरात पायी पालखी सोहळा शेगावकडे रवाना झाला. पंचक्रोशीतील भाविकांचे श्रद्धास्थान असलेल्या श्री संत गजानन महाराज मंदिर (रेणुका नगर) जय बजरंग हरिपाठ मंडळाच्या माध्यमातून सोहळा आयोजित करण्यात आला. जिल्ह्यात शेगावनिवासी संत गजानन महाराज यांच्या भक्तांची संख्या प्रचंड आहे. दर गुरुवारी अनेक ठिकाणी धार्मिक कार्यक्रमांचे आयोजन करण्यात येते. गजानन महाराज प्रगट दिनानिमित्त महाप्रसादाचे वितरण करण्यात येते. वारीला जाणाऱ्या भाविकांची संख्याही दिवसेंदिवस वाढतच आहे. दरम्यान बोरगाव मंजू येथील जय बजरंग हरिपाठ मंडळ व संत गजानन महाराज मंदिर (रेणुका नगर) यांच्या वतीने वर्षभर सामाजिक हितासह अन्य धार्मिक उत्सव वर्षभर आयोजित करण्यात येतात. गत २३ वर्षांपासून कार्यक्रमांचे आयोजन करण्यात येत आहेत. यंदाही २३ वर्षांपासूनची पंरपरा कायम ठेवत पालखी सोहळ्याचे आयोजन करण्यात आले. भक्तांनी घेतले दर्शन पालखी सोहळा शुक्रवारी सकाळी शहरातील विविध मार्गांनी मार्गक्रमण करत असताना एका रथावर हुबेहूब संत गजानन महाराजांच्या स्वरुपात प्रतिकृती सिने कलावंत शाम पिपळकर यांनी साकारलेल्या भूमिकेत रथावर आरूढ झाले होते. भाविकांनी दरम्यान दर्शन घेऊन सेवा अर्पण केली. पालखी सोहळ्यात भाविकांची गर्दी झाली होती. असा झाला प्रारंभ सकाळी येथील रेणुका नगरातील संत गजानन महाराज मंदिरात श्रींच्या चरणी महापुजेसह जलाभिषेक करून पालखी सोहळ्यास प्रारंभ झाला. मुख्य मार्गावरून प्रस्थान होत असताना भाविकांनी स्वच्छतेसह रांगोळी काढून सहभागी होत. पालखीतील श्रींच्या चरणी मनोभावे पूजा करून सेवा अर्पण केली. मुख्य मार्गावरून नगर परीक्रमा करत सोहळा शेगावकडे मार्गस्थ झाला.