डॉ. अनिता अवचट स्मृती पुरस्कार सोहळा:पॅराप्लेजिक सेंटर आणि माऊथ आर्टिस्ट मृदुल घोष यांना सन्मान

पुण्यातील निवारा सभागृहात डॉ. अनिता अवचट स्मृती संघर्ष सन्मान पुरस्कार आणि डॉ. अनिल अवचट स्मृती सृजन सन्मान पुरस्काराचे वितरण करण्यात आले. ज्येष्ठ चित्रकार अन्वर हुसेन यांच्या अध्यक्षतेखाली झालेल्या कार्यक्रमात पुण्यातील 'पॅराप्लेजिक रिहॅबिलिटेशन सेंटर' आणि माऊथ आर्टिस्ट मृदुल घोष यांना हा सन्मान प्रदान करण्यात आला. प्रत्येक पुरस्काराचे स्वरूप रुपये २१ हजार रोख, मानपत्र आणि स्मृतिचिन्ह असे होते. कार्यक्रमात ज्येष्ठ मनोविकास तज्ज्ञ डॉ. आनंद नाडकर्णी, मुक्तांगण व्यसनमुक्ती केंद्राच्या संचालक डॉ. मुक्ता पुणतांबेकर यांच्यासह अनेक मान्यवर उपस्थित होते. अध्यक्षीय भाषणात अन्वर हुसेन यांनी आजच्या डिजिटल युगातील तरुणांसमोर अशा प्रेरणादायी यशोगाथा येणे आवश्यक असल्याचे सांगितले. पुरस्कार विजेते मृदुल घोष यांनी हवाई दलातील सेवेदरम्यान झालेल्या अपघातानंतर आलेल्या अपंगत्वावर मात करून चित्रकलेच्या माध्यमातून स्वतःला कसे उभे केले, याचे मार्मिक वर्णन केले. पॅराप्लेजिक रिहॅबिलिटेशन सेंटरचे कर्नल सुरेश कर्की यांनी सैनिकी प्रशिक्षणामुळे संघर्षाला सामोरे जाण्याची मिळालेली ताकद आणि संस्थेच्या कार्याचा आढावा घेतला. कार्यक्रमात डॉ. आनंद नाडकर्णी यांनी पुरस्कारार्थींशी संवादातून त्यांच्या कार्याची माहिती श्रोत्यांपर्यंत पोहोचवली.