दुचाकीच्या धडकेत महिलेचा मृत्यू:अन्य दोघे गंभीर जखमी

पैठण तालुक्यातील मुरमा येथे नातेवाईकांना भेटण्यासाठी आलेल्या रामचंद्र बाप्पासाहेब राक्षे आणि चंद्रकला रामचंद्र राक्षे (५५, रा. कुरण, ता. अंबड) या पती-पत्नीचा मंगळवारी सायंकाळी दुचाकी अपघात झाला. यात उपचारादरम्यान चंद्रकला राक्षे यांचा मृत्यू झाला आहे. तर रामचंद्र राक्षे आणि साहिल पठाण हे गंभीर जखमी असून त्यांच्यावर घाटी रुग्णालयात उपचार सुरू आहेत. मुरमा फाटा येथे धुळे-सोलापूर राष्ट्रीय महामार्ग ओलांडून बीडच्या दिशेने जात असताना छत्रपती संभाजीनगरहून भरधाव वेगाने येणाऱ्या साहिल असिफ पठाण (२०, रा. कन्नड) यांच्या दुचाकीने (एमएच २० जीएक्स ०४९६) त्यांच्या दुचाकीला (एमएच २१ जे १२८२) मागून जोरदार धडक दिली. या भीषण अपघातात चंद्रकला राक्षे यांच्या डोक्याला गंभीर दुखापत झाली. डावा हात पूर्णपणे चुरडला गेला. ग्रामस्थांनी तातडीने घटनास्थळी धाव घेतली. उद्धव मगरे, परमेश्वर मगरे, अजय मोठे, विशाल आहेर, दिनकर मापारी, एकनाथ मानमोडे आणि ॲम्बुलन्स कर्मचारी महेश जाधव यांच्या मदतीने जखमींना माळीवाडी-भोकरवाडी टोल नाका येथून १०३३ ॲम्बुलन्स व खाजगी वाहनाने पाचोड ग्रामीण रुग्णालयात दाखल करण्यात आले. डॉ. शिवाजी पवार यांनी प्राथमिक उपचार करून प्रकृती चिंताजनक असल्याने जखमींना छत्रपती संभाजीनगर येथील घाटी रुग्णालयात हलवले. उपचारादरम्यान चंद्रकला राक्षे यांचा मृत्यू झाला. रामचंद्र राक्षे आणि साहिल पठाण हे गंभीर जखमी असून त्यांच्यावर उपचार सुरू आहे.