देवाभाऊंच्या राज्यात लाडक्या बहिणी असुरक्षित… भयभीत, अंबरनाथमध्ये भरदिवसा महिलेची भोसकून हत्या

अंबरनाथमध्ये एका माथेफिरू तरुणाने भरदिवसा महिलेची तीक्ष्ण हत्याराने भोसकून हत्या केली. सीमा कांबळे असे मृत महिलेचे नाव आहे. रेल्वे पुलावर घडलेल्या या हत्याकांडाने खळबळ उडाली असून हल्लेखोर तरुणाला पोलिसांनी अटक केली आहे. राहुल भिंगारकर असे आरोपीचे नाव असून पैशाच्या वादातून हत्या झाल्याची प्राथमिक माहिती पोलिसांनी दिली. मृत महिला अंबरनाथच्या बारकूपाडा भागातील आहे. पुलावर दोघांमध्ये जोरजोरात भांडण सुरू असताना पादचाऱ्यांनी त्यांना समजावण्याचा प्रयत्न केला. मात्र राहुलने तिला भोसकले.

कल्याण बलात्कार पीडितेच्या घरावर हल्ला

कल्याणमध्ये अल्पवयीन मुलीवर अत्याचार करून निर्घृण हत्या केल्याच्या घटनेतील आरोपी नराधम विशाल गवळी व त्याची पत्नी जेलमध्ये आहेत. मात्र गवळीचे हस्तक पीडित कुटुंबाला केस मागे घेण्यासाठी वारंवार धमकावत आहेत. रविवारी मध्यरात्री  तीन गुंडांनी कुटुंबीयांना शिवीगाळ करत घराबाहेर तोडफोड केली.

 विशालला जामीन झाला तर एके-47 घेऊन येऊन गोळ्या घालू, अशी धमकीच गुंडांनी कुटुंबाला दिल्याने त्यांच्या जिवाला धोका निर्माण झाला आहे.  पीडित मुलीचे कुटुंब या धक्क्यातून अजून सावरलेले नसताना गवळीचे हस्तक त्यांच्यावर केस मागे घेण्यासाठी दबाब आणत आहेत. कुटुंबाला संरक्षण द्यावे, अशी मागणी असतानाही पोलिसांनी त्याकडे दुर्लक्ष केले. त्यामुळेच रविवारी रात्री तीन अज्ञात गुंडांनी दारू पिऊन घराबाहेर धिंगाणा घातला. ही संपूर्ण घटना सीसीटीव्ही कॅमेरात पैद झाली. या प्रकरणी पुरुषोत्तम शेलार या तरुणाला बेड्या ठोकल्यात.विशाल गवळीच्या तिघा भावांना  तडीपार केले  आहे. तरीही यातील दोघे अजूनही  राजरोस फिरत असल्याचा आरोप  आहे.

वरिष्ठ पोलीस निरीक्षकाची बदली

दरम्यान या प्रकरणात कोळशेवाडी पोलीस ठाण्याचे वरिष्ठ पोलीस निरीक्षक अशोक कदम यांची तडकाफडकी कल्याण पोलीस पंट्रोलमध्ये बदली करण्यात आली आहे. डीसीपी अतुल झेंडे यांनी हे प्रकरण गांभीर्याने घेतल्याने ही कारवाई झाल्याचे बोलले जात आहे.

वांद्र्यात रिकाम्या ट्रेनमध्ये हमालाचा महिलेवर बलात्कार

वांद्रे टर्मिनसमध्ये रेल्वेच्या डब्यात 55 वर्षीय महिलेवर एका हमालाने शनिवारी मध्यरात्री अत्याचार केल्याची संतापजनक घटना घडली. पीडित महिला आपल्या नातेवाईकांसह मुंबई पाहण्यासाठी आली होती. मात्र रात्री उशिरा ते मुंबईत पोहोचल्याने त्यांनी वांद्रे स्थानकातच राहण्याचा निर्णय घेतला होता. यावेळी प्लॅटफॉर्म नंबर 6 व 7 वर पीडित महिलेने आश्रय घेतला असताना एका हमालाने तिला जबरदस्तीने जवळच्याच रेल्वेत नेले आणि तिच्यावर अत्याचार केला. या अत्याचारातील आरोपी सीसीटीव्हीत कैद झाल्यामुळे पोलिसांनी अवघ्या दीड तासातच त्याला अटक केली.