पुण्यात बोगस जामीनदाराद्वारे गुन्हेगारांना तुरुंगातून बाहेर काढणारे रॅकेट उघडकीस:दोन वकिलांसह 11 जणांना बेड्या, न्यायाधीशदेखील रडारवर

वेगवेगळ्या गंभीर गुन्ह्यांत न्यायालयाने कारागृहात रवानगी केलेल्या गुन्हेगारांना न्यायालयातून जामीन मिळवून देण्यासाठी बनावट कागदपत्रे तयार करून त्याआधारे बोगस जामीनदाराला उभे करून कारागृहातून गुन्हेगारांना बाहेर काढणाऱ्या जामीनदाराच्या टोळीचा वानवडी पोलिसांनी पर्दाफाश केला. या प्रकरणात महत्त्वाची भूमिका बजावणाऱ्या दोन वकिलांसह ११ आरोपींना बेड्या ठोकण्यात आल्याची माहिती पोलिस उपायुक्त डॉ. राजकुमार शिंदे यांनी दिली. दरम्यान, या प्रकरणात न्यायाधीश आणि नाझर यांचीही नावे समोर आल्याने ते सध्या तपास यंत्रणेच्या रडारवर असल्याची माहिती सूत्रांनी दिली. या प्रकरणात अ‍ॅड. अस्लम गफूर सय्यद (४५, रा. वैदवाडी, हडपसर) आणि अ‍ॅड. सुरेश जाधव (४३, रा. हडपसर) या दोन वकिलांना अटक करण्यात आली. यापूर्वी बनावट जामीनदार म्हणून उभ्या राहिलेल्या संतोषकुमार तेलंग ( ३२, रा. हडपसर, पुणे), संजय पडवळ (४२, मुलुंड, मुंबई), सुभाष कोद्रे (४०, आंबेगाव, पुणे), ज्ञानेश्वर शिंदे (५५, खेड, पुणे), सुजित सपकाळ (३६, मुलुंड, मुंबई), गोपाळ कांगणे (३५,पिंपरी, पुणे), जितेंद्र कलगुटकर (३९, ठाणे), दर्शन शाह (४५, कॅम्प, पुणे) यांनाही अटक करण्यात आली आहे. २४ प्रकरणांत ३२ आरोपींना जामीन बोगस जामीनदाराची २४ प्रकरणे उघड झाली आहेत. यामध्ये ३२ आरोपींना जामीन मिळवून देण्यात आला आहे. न्यायालयात होणारी जातमुचलक्याइतकी रक्कम आरोपी कैद्याशी संबंधितांकडून घेत होते. या जामीन घोटाळ्यात आणखी सहभागी असणारे यानिमित्ताने रडारवर आले आहेत. बनावट जामीनदार तसेच बोगस खरेदी खते यामध्येही बनावट जामीनदार उभे केले असण्याची शक्यता पाहता चौकशी होण्याची शक्यताही वाढली आहे. बोगस जामीनदारास १५०० ते दोन हजार रुपये आणि येण्या-जाण्याचा खर्च दिला जात होता. बोगस कागदपत्रे बनवणाऱ्यांना ३ ते ४ हजार रुपये वाटप केले जात होते. उर्वरित रक्कम मुख्य आरोपी हे त्यांच्याकडे ठेवत असल्याचे तपासात समोर आले. मुंबई, ठाण्यातून जामीनदार आणून बनवली त्यांची बोगस कागदपत्रे गंभीर गुन्ह्यातील आरोपींना जामीन देण्यासाठी बोगस जामीनदार मुंबई, ठाणे तसेच ग्रामीण भागातून बोलावून त्यांची बनावट कागदपत्रे बनवल्याचे निष्पन्न झाले आहे. कोर्टाच्या नाझरला हाताशी धरून वकिलांनी न्यायालयाने भरण्यास सांगितलेली जातमुचलक्याच्या ठरलेल्या किमतीइतकी रक्कम गुन्हेगारांच्या नातेवाइकांकडून उकळली जात होती. त्यानंतर वकील ही रक्कम आपल्याकडे ठेवून घेत होते. ९५ बोगस रेशन कार्ड, ११ आधार कार्ड जप्त पोलिस उपायुक्त डॉ. राजकुमार शिंदे यांच्या मार्गदर्शनात सापळा लावून संतोषकुमार तेलंग याच्यासह पाच बनावट जामीनदारांना ताब्यात घेण्यात आले. मुख्य आरोपी फरहान ऊर्फ बबलू शेख या वेळी पळून गेला. सहा आरोपी अटक करून त्यांची चौकशी करण्यात आली. त्यामध्ये फरहान शेख याला बनावट व चोरून रबरी शिक्के तयार करून देणारा दर्शन शहा याला अटक करून त्याच्याकडून ९ रबरी स्टॅम्प व मशीन जप्त करण्यात आली. तसेच रेशन कार्ड देणारे पिराजी शिंदे, गोपाळ कांगणे यांनाही अटक झाली. त्यांच्याकडून ९५ बोगस रेशन कार्ड, ११ बनावट आधार कार्ड, मोबाइल हँडसेट, दुचाकी जप्त करण्यात आली आहे. याप्रकरणी अधिक तपास सुरू करण्यात आला आहे.