बुलडाण्यातील 'फिटस इन फेटू' शस्त्रक्रीया यशस्वी:तीन दिवसांच्या बाळाच्या पोटातून दोन अर्भकसदृश गोळे काढले, जगातील पहिलीच अशी शस्त्रक्रिया

अमरावतीच्या सुपर स्पेशालिटी रुग्णालयात एक ऐतिहासिक शस्त्रक्रिया पार पडली, जिथे एका तीन दिवसांच्या बाळाच्या पोटातून दोन अर्भकसदृश मांसाचे गोळे काढण्यात आले. ही जगातील अशा प्रकारची पहिलीच घटना मानली जात आहे, कारण आतापर्यंत नोंदवलेल्या 33 प्रकरणांमध्ये फक्त एकच गोळा आढळला होता. बुलडाणा जिल्ह्यातील घाटाखालच्या गावातील एका महिलेने 1 फेब्रुवारीला सव्वा दोन किलोग्रॅम वजनाच्या बाळाला जन्म दिला. प्रसूतीपूर्वी केलेल्या सोनोग्राफीत बाळाच्या पोटात असामान्य वाढ दिसून आली होती. वैद्यकीय भाषेत या दुर्मिळ स्थितीला 'पीटस् इन पीट्टू' किंवा 'टेरोटोमा' म्हणतात. पॅडियाट्रिक सर्जन डॉ. उषा गजभिये यांच्या नेतृत्वाखाली दीड तास चाललेल्या या जटिल शस्त्रक्रियेत डॉ. नवीन चौधरी यांनी सहकार्य केले, तर भूलतज्ज्ञ म्हणून डॉ. संजय महतपुरे यांनी जबाबदारी सांभाळली. रुग्णालयाचे वैद्यकीय अधीक्षक डॉ. अमोल नरोटे आणि प्रभारी वैद्यकीय अधीक्षक डॉ. मंगेश मेंढे यांच्या मार्गदर्शनाखाली ही शस्त्रक्रिया यशस्वीरीत्या पार पडली. शस्त्रक्रियेपूर्वी बाळाच्या सर्व आवश्यक चाचण्या करण्यात आल्या आणि बाळ शस्त्रक्रियेसाठी योग्य असल्याची खात्री करून घेण्यात आली. विशेष परिचारिका पथक आणि कक्षसेवकांच्या सहकार्याने ही दुर्मिळ शस्त्रक्रिया यशस्वीरीत्या पूर्ण करण्यात आली. डॉ. मेंढे यांच्या म्हणण्यानुसार, एकाच बाळाच्या पोटातून दोन अर्भकसदृश गोळे काढण्याची ही जगातील पहिलीच घटना असावी.