महादेवाच्या जीवनावर भव्य रंगावली प्रदर्शन:30 तासांत 100 कलाकारांनी साकारल्या 30 अद्भुत रांगोळ्या, 9 फेब्रुवारीपर्यंत विनामूल्य प्रवेश

पुणे येथील बालगंधर्व कलादालनात श्रीरंग कलादर्पण फाउंडेशनतर्फे 'हर हर महादेव' या अनोख्या रंगावली प्रदर्शनाचे आयोजन करण्यात आले आहे. प्रा. अक्षय शहापूरकर आणि त्यांच्या १०० विद्यार्थ्यांनी केवळ ३० ते ३५ तासांत महादेवांच्या जीवनातील विविध प्रसंग रंगावलीतून साकारले आहेत. प्रदर्शनात एकूण ३० रांगोळ्यांमध्ये शिवाची उत्पत्ती, सती वियोग, शिव-पार्वती विवाह सोहळा, अर्धनारी नटेश्वर, वीरभद्रेश्वर आणि हनुमंताची टू इन वन रांगोळी, कार्तिक स्वामींचे बालरूप आणि बारा ज्योतिर्लिंगांचे दर्शन यांचा समावेश आहे. या प्रदर्शनात थ्री डी रांगोळी, टू इन वन रांगोळी, पाण्यावर-पाण्याखाली रांगोळी, प्रतिबिंब रांगोळी, हलती रांगोळी आणि स्पॉटेड रांगोळी असे अनेक नाविन्यपूर्ण प्रकार पाहायला मिळत आहेत. प्रदर्शनाचे उद्घाटन ज्येष्ठ अध्यात्मिक गुरु स्थितप्रज्ञानंद सरस्वती माताजी आणि शिल्पकार प्रमोद कांबळे यांच्या हस्ते करण्यात आले. यावेळी फाउंडेशनचे पदाधिकारी प्रा. अक्षय शहापूरकर, अजित पवार, जगदीश चव्हाण, प्रतीक अथणे, महादेव गोपाळे आणि श्रीहरी पवळे उपस्थित होते. हे प्रदर्शन ९ फेब्रुवारीपर्यंत सकाळी ९ ते रात्री ८ या वेळेत सर्व नागरिकांसाठी विनामूल्य खुले असणार आहे.