माळशिरसमध्ये 749 पोस्टल मतदान:दिव्यांग आणि ज्येष्ठांची मतदान प्रक्रियाही सुरू

निवडणूकीसाठी नेमलेल्या अधिकारी, कर्मचारी यांना मतदानाचा हक्क बजावता यावा यासाठी निवडणूक आयोगाने त्यांना टपालाद्वारे मतदानाची सुविधा उपलब्ध करून दिली आहे. ११ नोव्हेंबरपासून सुरु झालेल्या पोस्टल मतदान प्रक्रियेत आतापर्यंत ७४९ जणांनी मतदान केल्याची माहिती निवडणूक निर्णय अधिकारी विजया पांगारकर यांनी दिली. दिव्यांग आणि ज्येष्ठ मतदारांचे मतदान प्रक्रिया सुरु झाल्याचे त्यांनी सांगितले. माळशिरस मधील मतदार असणारे अधिकारी, कर्मचारी यांनी भरून दिलेल्या फॉर्मची संख्या १०६९ एवढी होती. होमगार्ड यांनी १४२ फॉर्म भरून दिले होते. व इतर २८७ मतदारसंघातील मिळून २०२६ अर्ज टपाली मतदानासाठी अर्ज आले आहेत. या अर्जाची छाननी करून त्यांना टपाली मतपत्रिका देण्याची कार्यवाही पूर्ण करण्यात आलेली आहे. दिव्यांग आणि ८५ वर्षापुढील ज्येष्ठ मतदाराची मतदानप्रक्रिया बुधवारपासून सुरु झाली. पहिल्या दिवशी गुरसाळे येथे छाया चव्हाण या १०४ वर्षांच्या आजीबाईनी तसेच गिरवी येथील जयराम मोरे या ९६ वर्षांच्या आजोबांनी या माध्यमातून मतदानाचा हक्क बजावला. तसेच १२ व १३ रोजी १५०५ कर्मचाऱ्यांना मतदान प्रशिक्षण देण्यात आले. या प्रशिक्षणास गैरहजर राहिलेल्या ८३ जणांवर फौजदारी कारवाई होणार असल्याचे सांगण्यात आले.