रिल्स तयार करण्याच्या मुद्यावरून वाद:4 महिलांनी कापले महिलेचे केस, पुण्यातील घटना; मोबाईलसह दुचाकीही लंपास

रिल्स काढल्याच्या वादातून चार महिलांनी एका महिलेसह तिच्या पतीला मारहाण करून तिचे केस कापल्याची घटना विमानतळ परिसरातील खांदेवनगरमध्ये घडली आहे. आरोपी महिलांनी तक्रारदार महिलेचा मोबाइल, दुचाकी असा १ लाख १५ हजारांचा ऐवज चोरून नेला. याप्रकरणी महिलेने विमानतळ पोलिस ठाण्यात तक्रार दाखल केली असल्याची माहिती पोलिसांनी शुक्रवारी दिली. पोलिसांनी दिलेल्या माहितीनुसार, तक्रारदार महिला खांदवेनगरमध्ये राहायला आहे. तिचे रिल्स काढण्याच्या मुद्यावरून आरोपी महिलांसोबत भांडण झाले होते. त्याच रागातून आरोपी महिला १३ नोव्हेंबर रोजी रात्लारी साडेनऊच्या सुमारास तक्रारदार महिलेच्या घरात शिरल्या. त्यांनी तिच्यासह पतीला मारहाण केली. तिचे केस कापून मोबाईल व दुचाकी चोरून नेली. याप्रकरणी सहायक पोलिस निरीक्षक विजय चंदन तपास करीत आहेत. हडपसर परिसरात एकावर कोयत्याने वार, आरोपीला अटक दुचाकीमध्ये पेट्रोल भरण्यासाठी जाणार्‍याला अडवून त्याच्यावर वार करणार्‍या आरोपीला काळेपडळ पोलिसांनी अटक केली आहे. ही घटना हडपसर मधील सय्यदनगरमध्ये घडली आहे. मोहम्मद हुसेन शबीर शेख उर्फ अज्जू (रा. ससाणेनगर ) असे अटक केलेल्या आरोपीचे नाव आहे. पोलिसांनी दिलेल्या माहितीनुसार, तक्रारदार आणि त्यांचे मित्र दुचाकीमध्ये पेट्रोल भरण्यासाठी जात होते. त्यावेळी सय्यनगरमधील गल्ली क्रमांक १५ मध्ये आरोपी अज्जूने त्यांना अडविले. हातातील कोयत्याने धाक दाखवून आरडाओरड केली. परिसरात दहशत निर्माण करण्याच्या हेतूने तक्रारदारावर वार करून जखमी केले. त्यानंतर आरोपी पसार झाला होता. काळेपडळ पोलिसांनी त्याला अटक केली आहे. पोलिस उपनिरीक्षक प्रशांत लटपटे तपास करीत आहे.