वयोश्रीने वाढविली वृद्धांसाठी डोकेदुखी

रायगड : राज्य शासनाच्या मुख्यमंत्री वयोश्री योजनेअंतर्गत रायगड जिल्ह्यातील 11 हजार ज्येष्ठ नागरिकांच्या बँक खात्यावर प्रत्येकी 3 हजार रुपयांप्रमाणे मदत निधी वर्ग करण्यात आला आहे. जिल्ह्यात सुमारे 3 कोटी 30 लाख रुपयांचा निधी ज्येष्ठांच्या खात्यावर जमा झाला आहे. मात्र लाभार्थीनी खरेदी केलेल्या साहित्याची बिले एक महिन्याच्या आत जमा करायची आहेत. सध्या विधानसभा निवडणुकीची धामधुम सुरू असल्याने आपल्याला बिले वेळेत सादर करता येतील की नाही याची चिंता लाभार्थींना सतावत आहे.

राज्यातील वय वर्षे 65 व त्यावरील ज्येष्ठ नागरिकांसाठी ‘मुख्यमंत्री वयोश्री योजना’ राज्य शासनाकडून सुरू करण्यात आली आहे. रायगड जिल्हयात ज्येष्ठ नागरिकांची संख्या सुमारे साडेतीन लाख आहे. योजना सुरू झाल्यापासून लाभार्थ्यांकडून योजनेला अल्प प्रतिसाद मिळत होता; मात्र, शासनाने जिल्हा स्तरावर आढावा घेत ग्रामीण भागात ग्रामपंचायत पातळीपासून यंत्रणा कामाला लावली. त्यामुळे वयोश्री योजनेसाठी ज्येष्ठ नागरिकांचा प्रतिसाद वाढला. रायगड जिल्हयात 27 हजार 474 ज्येष्ठ नागरिकांनी या योजनेच्या लाभासाठी अर्ज केला आहे. त्यापैकी 18 हजार 820 अर्जांची तपासणी करण्यात आली आहे. तर 11 हजार ज्येष्ठ नागरिकांच्या बँक खात्यावर प्रत्येकी 3 हजार रुपयांप्रमाणे मदत निधी वर्ग करण्यात आला असल्याची माहिती रायगड जिलह्याच्या समाजकल्याण विभागाकडून देण्यात आली. 3 कोटी 30 लाख रुपयांचा निधी ज्येष्ठांच्या खात्यावर जमा झाला आहे.

लाभार्थ्यांच्या बँकेच्या वैयक्तिक आधार संलग्न बचत खात्यात तीन हजार रुपये थेट लाभ वितरण प्रणालीद्वारे वितरित झाल्यावर सदर योजनेअंतर्गत येणारी उपकरणे खरेदी केल्याचे तसेच मनःस्वास्थ्य केंद्राद्वारे प्रशिक्षण घेतल्याचे लाभार्थ्यांचे देयक प्रमाणपत्र 30 दिवसांच्या आत संबंधित साहाय्यक आयुक्त, समाजकल्याण यांच्याकडून प्रमाणित करून संबंधित केंद्रीय सामाजिक उपक्रम संस्थेमार्फत विकसित पोर्टलवर 30 दिवसांच्या आत अपलोड करणे आवश्यक आहे. अन्यथा लाभार्थ्यांकडून सदर रक्कम वसूल केली जाण्याची शक्यता आहे.