वाहतुकीचे नियम पाळा आणि अपघात टाळा:करकंबमध्ये रॅली काढून नागरिकांमध्ये जागृती

सर्वांनी वाहतूकीचे नियम पाळले तर निश्चितच अपघाताचे प्रमाण कमी होण्यास मदत होईल असे मत करकंब पोलीस ठाण्याचे सपोनि सागर कुंजीर यांनी व्यक्त केले. करकंब पोलीस ठाणे आणि आदर्श प्रशाला व ज्युनियर कॉलेज करकंब यांच्या संयुक्त विद्यमानाने रस्ता सुरक्षा सप्ताहानिमित्त जनजागृती प्रभात फेरी काढण्यात आली. सध्या वाहनांचे प्रमाण वाढले आहे. कमी वेळात जास्त अंतर प्रवास करावा म्हणून वाहन जास्त वेगाने चालविले जाते. हेल्मेट घातले जात नाही, वाहन व्यवस्थित आहे का याकडे लक्ष दिले जात नाही. त्यामुळे अपघात होत आहेत त्यावर आळा घालण्यासाठी सर्वांनी वाहतुकीचे नियम पाळले पाहिजेत असे मार्गदर्शन सपोनि सागर कुंजीर यांनी केले. प्रा बापूराव खांडेकर यांनी आभार मानले. करकंब गावातून वाहतूकीच्या नियमांचे फलक घेऊन घोषणा देत लोकांमध्ये जागृती निर्माण करण्याचे काम करकंब पोलीस ठाण्यातील पोलिसांनी व विद्यार्थ्यांनी केले.