शासकीय रुग्णालयात खाटा वाढवा- डॉ. सुधीर ढोणे:रुग्णांचे हाल टाळण्यासाठी वैद्यकीय शिक्षणमंत्री हसन मुश्रीफ यांच्याकडे मागणी

शासकीय वैद्यकीय महाविद्यालय व सर्वोपचार रुग्णालयात सध्या शासनाने मंजूर केलेल्या खाटांची संख्या ४७६ आहे. परंतु या रुग्णालयात प्रत्यक्षात दररोज एक हजारपेक्षा अधिक रुग्ण भरती असतात. त्यामुळे रुग्णालय प्रशासनाने काही खाटांची तात्पुरती व्यवस्था केली आहे. मात्र, डॉक्टर, परिचारिका, पॅरामेडिकल स्टाफ व औषधे या बाबी केवळ ५०० खाटांसाठीच उपलब्ध असल्याने गरीब रुग्णांचे हाल होत आहेत. पावसाळ्यात व अनेकदा उन्हाळ्यातही खाटांअभावी रुग्णांना जमिनीवर झोपवून इलाज केले जातात. त्यामुळे गरीब रुग्णांचे हाल टाळण्यासाठी शासकीय वैद्यकीय महाविद्यालय व सर्वोपचार रुग्णालयातील खाटांची संख्या वाढवून ती एक हजार करावी, अशी मागणी महाराष्ट्र प्रदेश काँग्रेस कमिटीचे प्रवक्ते डॉ. सुधीर ढोणे यांनी राज्य शासनाकडे केली आहे. राज्याचे वैद्यकीय शिक्षण मंत्री हसन मुश्रीफ यांची भेट घेवून डॉ. सुधीर ढोणे यांनी त्यांना निवेदन दिले व चर्चा केली. डॉ. सुधीर ढोणे यांनी वैद्यकीय शिक्षण मंत्र्यांना दिलेल्या निवेदनात म्हटले आहे की, अकोला येथील शासकीय वैद्यकीय महाविद्यालय व सर्वोपचार रुग्णालयात बुलढाणा, वाशिम, हिंगोली व अकोला जिल्ह्यातील रुग्ण हजारोंच्या संख्येने दररोज येत असतात. या चार जिल्ह्यापैकी केवळ अकोला येथेच पूर्ण क्षमतेचे शासकीय वैद्यकीय महाविद्यालय आहे. त्यामुळे या रुग्णालयात रुग्णांची प्रचंड गर्दी असते. अनेक वेळा एकाच खाटेवर दोन रुग्णांवर उपचार केले जातात. त्यामुळे या रुग्णालयात असलेल्या ४७६ खाटांच्या संख्येत वाढ करून त्या एक हजार इतक्या कराव्यात अशी मागणी निवेदनात केली आहे. सर्वोपचार रुग्णालयातील खाटांची संख्या ४७६ वरून एक हजार पर्यंत वाढवल्यास सध्या कार्यरत असलेल्या डॉक्टर, परिचारीका, वार्ड बॉय, पॅरामेडिकल स्टॉफ, सफाई कर्मचारी व अन्य कर्मचार्‍यांच्या संख्येत दुप्पटीने वाढ करावी लागणार आहे. सध्या पुरवला जात असलेला औषधांचा साठा व यंत्रसामग्री दुप्पटीने वाढणार आहे. याशिवाय खाटांची संख्या वाढणार असल्याने सध्या अस्तीत्वात असलेल्या इमारतींपेक्षा दुप्पट इमारत उपलब्ध करून द्यावी लागणार आहे. त्यामुळे गरीब रुग्णांचे सध्या होत असलेले हाल टाळता येतील अशी अपेक्षा डॉ. सुधीर ढोणे यांनी व्यक्त केली आहे.