शिवजयंतीनिमित्त अमरावतीत अनोखी स्पर्धा:घरगुती शिवसजावटीसाठी 21 हजारांचे बक्षीस; वर्ल्ड ग्रेटेस्ट रेकॉर्डमध्ये होणार नोंद

अमरावतीत येत्या १९ फेब्रुवारीच्या शिवजयंतीनिमित्त एक अनोखी स्पर्धा आयोजित करण्यात आली आहे. १९ ते २१ फेब्रुवारी दरम्यान होणाऱ्या या स्पर्धेत सर्वोत्कृष्ट शिवसजावट करणाऱ्याला २१ हजार रुपयांचे प्रथम बक्षीस मिळणार आहे. जिजाऊ बँक आणि आयोजन समितीच्या संयुक्त विद्यमाने हे प्रथम बक्षीस दिले जाणार आहे. द्वितीय बक्षीस ११ हजार रुपये, तृतीय बक्षीस ५ हजार रुपये आणि चतुर्थ बक्षीस २,५०० रुपये असे एकूण बक्षीस वितरण होणार आहे. स्पर्धेच्या दशकपूर्तीनिमित्त ११ हजार रुपयांची विशेष प्रोत्साहनपर बक्षिसेही ठेवण्यात आली आहेत. स्पर्धेत शिवरायांची आग्रा भेट, छत्रपती शिवरायांचे निष्ठावंत मावळे आणि प्रतापगडावरील रणसंग्राम या विषयांवर सजावट करायची आहे. स्पर्धकांनी घरी शिवरायांच्या मूर्ती किंवा फोटोचे पूजन करून आकर्षक सजावट करावयाची आहे. सजावटीचे तीन फोटो कुटुंब, शेजारी व मित्रमंडळींसह काढून संयोजकांकडे पाठवावयाचे आहेत. स्पर्धेसाठी दोन वयोगट ठेवण्यात आले आहेत - ५ ते १६ वर्षे वयोगटासाठी 'अ' गट आणि १७ ते ३० वर्षे वयोगटासाठी 'ब' गट. विषयाची मांडणी, कौटुंबिक सहभाग, वेशभूषा, सामाजिक संदेश, प्रचार-प्रसार आणि मागील वर्षीचा सहभाग या निकषांवर गुणांकन केले जाईल. डॉ. तुषार देशमुख यांच्या संकल्पनेतून साकारलेल्या या स्पर्धेचे वैशिष्ट्य म्हणजे याची नोंद 'वर्ल्ड ग्रेटेस्ट रेकॉर्ड'मध्ये केली जाणार आहे. विविध सामाजिक संघटना, युवक मंडळे आणि शिवप्रेमींच्या संघटनांनी या उपक्रमात सहभाग घेतला आहे.