सापुतारा घाटामध्ये बस 200 फूट दरीत कोसळून 5 ठार,45 जखमी:सर्व भाविक मध्य प्रदेशातील; त्र्यंबकेश्वरहून द्वारकेला जाताना अपघात

सापुताऱ्याजवळ माळेगावच्या घाटात रविवारी पहाटे साडेचारदरम्यान चालकाचे नियंत्रण सुटल्याने खासगी बस २०० फूट खोल दरीत कोसळून ५ ठार, तर ४५ भाविक जखमी झाले. मृतांत २ महिलांसह ३ पुरुषांचा समावेश आहे. सर्व भाविक मध्य प्रदेशातील गुणा जिल्ह्यातील शिवपुरी आणि अशोकनगर परिसरातील असून ते २३ डिसेंबरपासून तीर्थयात्रेसाठी निघाले होते. त्र्यंबकेश्वर येथून दर्शनानंतर गुजरातमधील द्वारका येथे दर्शनासाठी जात असताना हा अपघात झाला. अपघातात रतनलाल जाधव (४१, चालक, रा. वृषल्ला), भोलाराम कुशवाह (५५, रा. रामगड, शिवपुरी), गुड्डीबेन राजेश यादव (६०,रा.रामगड, शिवपुरी), बिजेंद्रसिंग बादलसिंग यादव (५५, रा.भद्रावाड), कमलेश बिस्पालसिंग यादव (६०, रा.रामगड, शिवपुरी) यांचा मृत्यू झाला आहे. अपघातातील २४ गंभीर जखमींना तत्काळ १०८ रुग्णवाहिकेद्वारे अहवा तसेच सुरत येथील जिल्हा रुग्णालयात उपचारासाठी हलवण्यात आले. किरकोळ जखमी २१ भाविकांना जवळच्या शामगव्हाण येथील शासकीय रुग्णालयात उपचारासाठी आणण्यात आले. सापुतारा, साखरपातल आणि गलकुंड येथील शासकीय रुग्णालयातील वैद्यकीय पथक रुग्णांच्या सेवेसाठी तैनात करण्यात आले होते. तातडीने मदत आणि बचावकार्य केल्याबद्दल प्रवाशांनी प्रशासनाचे आभार मानले. यंत्रणेकडून सर्व व्यवस्था घटनेची माहिती मिळताच डांग प्रांताधिकाऱ्यांसह आपत्ती व्यवस्थापन, आरोग्य अधिकारी आणि पोलिस अधिकाऱ्यांसह प्रशासनाकडून मदत आणि बचावकार्य केले जात आहे. जखमींना संपूर्ण उपचार मिळावेत यासाठी यंत्रणेकडून रुग्णालयात सर्व व्यवस्था करण्यात आली आहे. -महेश पटेल, जिल्हाधिकारी, डांग जखमींना तातडीने मदत अपघात होताच सापुतारा पोलिस ठाणे, होमगार्ड तसेच स्थानिकांनी जखमींना तातडीने मदत मिळवून दिली. संपूर्ण घटनेचा तपास सापुतारा पोलिस करत आहेत. -सुनील पाटील, जिल्हा पोलिस उपअधीक्षक