सोयाबीन खरेदीकरिता मुदतवाढ देण्याची शेतकऱ्यांकडून मागणी:नोंदणी केलेल्या शेतकऱ्यांची खरेदी करा

लासलगाव सोयाबीन उत्पादक शेतकऱ्यांना दिलासा देण्यासाठी केंद्र व राज्य सरकारतर्फे नाफेड आणि एनसीसीएफमार्फत हमीभावाने सोयाबीन खरेदी सुरू करण्यात आली होती. मात्र, अजूनही मोठ्या प्रमाणात शेतकऱ्यांची सोयाबीन विक्री करणे बाकी असल्याने ३१ जानेवारीस मुदत संपली आहे. ही मुदत राज्य शासनाने वाढविण्याची मागणी शेतकऱ्यांकडून केली जात आहे. नाशिक जिल्ह्यात सध्या मोठ्या प्रमाणात सोयाबीनचे उत्पादन घेतले जाते. केंद्र व राज्य सरकारतर्फे नाफेड, एनसीसीएफमार्फत ४ हजार ८९२ रुपये प्रति क्विंटल हमीभावानुसार सोयाबीनच्या खरेदीला सुरुवात करण्यात आली होती. त्यास परिसरातील शेतकऱ्यांनी चांगला प्रतिसाद दिला. जिल्ह्यातील लासलगाव, येवल्यासह सोयाबीन खरेदी केंद्रावर ४२७५ शेतकऱ्यांनी सोयाबीन विक्रीसाठी नोंदणी केली. यातील ८७३ शेतकऱ्यांची ११ हजार ५०५ क्विंटल सोयाबीन खरेदी शासनातर्फे करण्यात आली. आणखी ३४०२ शेतकरी सोयाबीन विक्रीपासून वंचित असताना आता सोयाबीन खरेदीची ३१ जानेवारी रोजी मुदत संपणार असल्यामुळे नोंदणी केलेल्या सोयाबीन उत्पादक शेतकऱ्यांनी सोयाबीन विक्रीसाठी सोयाबीन खरेदी केंद्रावर एकच गर्दी केल्याचे चित्र पहायला मिळाले. दरम्यान, अनेक शेतकरी सोयाबीन विक्रीपासून वंचित राहणार असल्याने हमीभाव खरेदीची मुदत शासनाने वाढवावी, अशी मागणी होत आहे. अजून अनेक शेतकऱ्यांकडे सोयाबीन मोठ्या प्रमाणात शिल्लक आहे. लासलगाव येथील सोयाबीन केंद्रावर विक्रीसाठी झालेली शेतकऱ्यांची गर्दी. ^निफाड तालुक्यात मोठ्या प्रमाणात सोयाबीनचे उत्पादन घेतले जाते. केंद्र सरकारच्या वतीने हमीभाव दर सोयाबीनला जाहीर करण्यात आला आहे. त्या दराने सोयाबीनची खरेदी केली जात आहे. मात्र, मुदत शुक्रवारी संपत आहे. अजूनही बऱ्याच शेतकऱ्यांची सोयाबीन विक्री बाकी आहे. त्यामुळे या योजनेला मुदतवाढ देऊन शेतकऱ्यांना दिलासा द्यावी. - मनोहर बोचरे, देवगाव