७ फूट उंच, रुंद छाती आणि हात-गळ्‍यात रुद्राक्ष...कोण आहेत 'हे' मस्कुलर बाबा?

प्रयागराजच्या महाकुंभात सध्या एका अनोख्या संताने सर्वांचे लक्ष आपल्‍याकडे खेचले आहे. या बाबांची पिळदार शरीरयष्‍ठी, ताडमाड उंची, पांढरीशुभ्र दाढी आणि करारी आणि तेजपुंज चेहऱ्यावरचे भाव यामुळे ते प्रयागराजमध्ये आणि सोशल मीडियावर चांगलेच चमकत आहेत. त्‍यांचे अनेक फोटो, व्हिडिओ सध्या इंटरनेटवर तुफान शेअर होत आहेत. या बाबांना जेंव्हा कोणी बघतो तेंव्हा तो बघतच राहतो.

या बाबांचे नाव आत्‍म प्रेम गिरी असल्‍याचं म्‍हंटलं जातं. हे बाबा नेपाळमध्ये गेल्‍या ३० वर्षांपासून राहत आहेत. इतकच नाही तर हे बाबा मुळचे रशियाचे आहेत. गेल्‍या ३० वर्षांपासून त्‍यांनी आपले जीवन सनातन धर्मासाठी समर्पित केले आहे. मिळालेल्‍या माहितीनुसार, रशियामध्ये ते शिक्षक होते. त्‍यांनी आपला तो पेशा सोडून सनातन धर्माची सेवा ते करत हिंदू धर्माचा प्रचार करत आहेत. सध्या हे बाबा महाकुंभात आले आहेत. आपल्‍या प्रसन्न आणि करारी चेहऱ्यावरील भावमुंद्रांमुळे ते सोशल मीडियावर चर्चेचा विषय बनले आहेत.

सोशल मीडियावर या मस्‍कुलर बाबांचे अनेक व्हिडिओ आणि फोटो शेअर आणि व्हायरल होत आहेत. काही फोटोंमध्ये ते जिम मध्ये डंबेल्‍स उचलताना दिसत आहेत. तर काही फोटोंमध्ये ते ध्यानाला बसलेले दिसत आहेत. त्‍यांच्या शरीरावर भगवे वस्‍त्र, गळ्यात रूद्राक्ष माळा आणि त्‍यांच्या चेहऱ्यावरचे तेज त्‍यांना गर्दीतही इतरांपासून वेगळे करते. सोशल मीडियावर तर काहींनी त्‍यांना भगवान परशुराम म्‍हणून नामकरण करत आहेत.

या मस्‍कुलर बाबांचे म्‍हणणे आहे की, त्‍यांनी आपले जीवन हिंदू धर्म आणि सनातनाच्या प्रचारासाठी समर्पित केले आहे. बाबा नेपाळमध्ये राहतात आणि आपले जीवन हिंदू धर्माचा प्रचार-प्रसार करण्यात व्यतीत करत आहेत. सोबतच ते जूना आखाड्याचे सदस्‍यही आहेत.