30 जैन मुनींची पंढरपूर शहरात शोभायात्रा:आढीवमधील महोत्सवावेळी ध्वाजरोहण, जैन धर्मीयांचा पंचकल्याणक महोत्सवात बांधव सहभागी

शनिवारी सकाळी जैन धर्मातील आचार्य विशुद्ध सागर महाराज यांच्यासह तब्बल ३० साधूंची पंढरपूर शहरात सवाद्य शोभा यात्रा काढण्यात आली. त्याचबरोबर दुपारी आढीव येथील तपोवन भूमीत ध्वजारोहण करून पंचकल्यानक महोत्सवाचा शुभारंभ करण्यात आला. यावेळी आचार्य विशुध्द सागर महाराजांनी धर्माचे पालन करण्याचे आवाहन साधकांना केले. येथील बालरोग तज्ञ डॉ.शितल शहा यांच्या आढीव येथील तपोवन शेतमळ्यात नव्याने बांधण्यात आलेल्या मंदिराच्या प्रतिष्ठेसाठी देशभरातून ३० जैन साधूंचे आगमन झाले आहे. शनिवारी पंचकल्याणक प्रतिष्ठेचा पहिला दिवस होता. सकाळी १० वाजता पंढरपूर नगरीमध्ये संगोला चौकात प.पू.चर्याशिरोमणी आचार्य विशुध्द सागर महाराजांचे आगमन झाले. त्यांच्यासोबत ३० संघस्त साधूचांही शहरात प्रवेश झाला. सर्व साधूंच्या स्वागतासाठी पंढरपूर शहर आणि तालुक्यातील हजारो भक्त,श्रध्देय श्रावक - श्राविका उपस्थित होते. सर्व साधूंचे आगमन झाल्यानंतर डॉ.शितल शहा यांनी सपत्नीक पादप्रक्षालन करुन स्वागत केले. त्यानंतर हजारो संखेने उपस्थित असलेल्या जनसमुदायासह मंगल वाद्यासह , बॅण्ड पधकासह मिरवणूकीने महाराज श्री वीरसागर नगर मध्ये स्वागतासाठी उत्साहित असलेल्या भक्तगणांना आशीर्वाद देण्यासाठी उपस्थित झाले. यावेळी उपस्थित सर्व साधकांनी तीस साधूंचे पाद प्रक्षलन केले, त्यानंतर जैन मुनी यांनी प्रवचन केले. यावेळी पंढरपूरचे मुनी सुयश सागर महाराज यांनी आपल्या दीक्षा घेण्याचा अनुभव सांगितला. यावेळी बोलताना आचार्य विशुद्ध सागर महाराज यांनी प्रवचन करताना साधकांना सांगितले की, जैन धर्मासाठी आपण सर्व संसाराचा त्याग केला तरच मोक्ष आणि लक्ष्मी प्राप्त होते, असे सांगून मनुष्य जन्म महत्प्रयासाने मिळालेला आहे, त्या जन्माचे सार्थक होण्यासाठी धर्माचे पालन करण्याचे आवाहन केले.