September 21, 2024
عظمیٰ نیوز سروس
نئی دہلی// جموں و کشمیر اور لداخ ہائی کورٹ کیلئے جسٹس تاشی ربستان کونئے چیف جسٹس کے بطور تقرری عمل میں لائی گئی ہے۔اس سلسلے میں صدر جمہوریہ نے منظوری دے دی ہے۔جسٹس ربستان کے نام کی سفارش کرتے ہوئے سپریم کورٹ کولجیم نے کہا تھا کہ وہ لداخ علاقے سے پہلے چیف جسٹس ہوں گے، جس کی ہائی کورٹ کے ججوں میں بہت کم یا کوئی نمائندگی نہیں ہے اور اب تک اس میں کوئی نمائندگی نہیں ہے۔ جسٹس تاشی ربستان کے علاوہ جسٹس ایم ایس رام چندر را کو جھارکھنڈ ہائی کورٹ کے چیف جسٹس کے طور پر تبدیل کر دیا گیا ہے۔دہلی ہائی کورٹ کے جج جسٹس راجیو شکدھر کو ہماچل پردیش ہائی کورٹ کا چیف جسٹس بنایا گیا ہے۔ممبئی ہائی کورٹ کے جج جسٹس نتن مدھوکر جمدار کو کیرالہ ہائی کورٹ کا چیف جسٹس مقرر کیا گیا ہے۔ممبئی ہائی کورٹ کے جسٹس کے آر شریرام کو مدراس ہائی کورٹ کا چیف جسٹس بنایا گیا ہے۔کلکتہ ہائی کورٹ کے جسٹس اندرا پرسنا مکھرجی کو میگھالیہ ہائی کورٹ کا چیف جسٹس مقرر کیا گیا ہے۔دہلی ہائی کورٹ کے جسٹس سریش کمار کیت کو مدھیہ پردیش ہائی کورٹ کا چیف جسٹس بنایا گیا ہے۔اس کے علاوہ، تین جوڈیشل افسران کو مدراس ہائی کورٹ کے ایڈیشنل جج کے طور پر ترقی دی گئی ہے۔