ریاستی درجہ کی بحالی سے جموں و کشمیر اسمبلی کی حیثیت تبدیل نہیں ہو گی: قانونی ماہرین

File Image

عظمیٰ ویب ڈیسک

نئی دہلی// قانونی ماہرین نے کہا ہے کہ اگر مرکزی حکومت مستقبل میں ریاست جموں و کشمیر کی حیثیت کو بحال کرتی ہے تو اس کا اثر نئے قانون ساز اسمبلی کی حیثیت پر نہیں پڑے گا۔
سینئر وکیل اور آئینی ماہر راکیش دویدی نے اس بات پر زور دیا کہ اگر مرکزی حکومت ریاست کی حیثیت بحال کرتی ہے تو اسمبلی کو تحلیل کرنا ضروری نہیں ہوگا۔ سینئر ایڈوکیٹ گوپال شنکرنارائن نے بھی یہی رائے ظاہر کی کہ ریاستی درجہ کی بحالی سے اسمبلی کی تشکیل پر کوئی اثر نہیں پڑے گا۔
یہ تبصرے اُس وقت سامنے آئے جب ریاستی درجہ کی بحالی کیلئے آوازیں اٹھنے لگی ہیں، جو کہ جموں و کشمیر نیشنل کانفرنس کے اہم انتخابی نکات میں سے ایک تھی۔
نیشنل کانفرنس اور کانگریس کے اتحاد نے 2019 میں آرٹیکل 370 کی منسوخی کے بعد جموں و کشمیر میں ہونے والے پہلے انتخابات میں شاندار فتح حاصل کی۔
دویدی نے مزید کہا، “اسمبلی کی تحلیل ضروری نہیں ہے۔ یہ ریاستی اسمبلی کی حیثیت سے کام کرتی رہے گی۔ ایک پارلیمانی قانون جو موجودہ قانون میں ترمیم کرتا ہے، دفعہ 370 کی منسوخی کے بعد کافی ہوگا۔ یہاں تک کہ اگر جموں و کشمیر کی دو ریاستیں تشکیل دی جائیں، تو یہ ایک ریاستی تنظیم نو کے قانون کے تحت ہوگا”۔
11 دسمبر 2023 کو سپریم کورٹ نے متفقہ طور پر 2019 میں آرٹیکل 370 کی منسوخی کی توثیق کی، جو ریاست جموں و کشمیر کو خصوصی حیثیت دیتا تھا، جبکہ اسمبلی انتخابات کے انعقاد کی ہدایت بھی دی گئی اور ریاست کی حیثیت کی بحالی کی ضرورت پر زور دیا۔
چیف جسٹس آف انڈیا ڈی وائی چندرچوڑ نے فیصلے میں کہا کہ ریاست کی حیثیت کو جلد از جلد بحال کیا جائے گا۔
رواں ہفتے کے آغاز میں سپریم کورٹ میں ایک درخواست دائر کی گئی تھی جس میں مرکزی حکومت سے درخواست کی گئی تھی کہ وہ دو ماہ کے اندر ریاست جموں و کشمیر کی حیثیت بحال کرے۔