पडद्यामागील किस्से रसिकांपर्यंत पोहोचवणार:बिग मराठी बायोस्कोप कार्यक्रमातून ग्रामीण भागातही मराठी चित्रपट सोहळा घेणार - सुबोध भावे

मराठी चित्रपटसृष्टीतील प्रसिद्ध अभिनेता सुबोध भावे याने मराठी चित्रपटांच्या प्रचार आणि प्रसारासाठी नवा पुढाकार घेतला आहे. बिग एफएमवरील 'बिग मराठी बायोस्कोप विथ सुबोध भावे' या कार्यक्रमाच्या तिसऱ्या पर्वाच्या निमित्ताने आयोजित पत्रकार परिषदेत त्याने या उपक्रमाची माहिती दिली. सुबोध भावे यांनी सांगितले की, या कार्यक्रमाद्वारे मराठी चित्रपट आणि नाटकांच्या पडद्यामागील अनेक रंजक किस्से आणि कहाण्या प्रेक्षकांपर्यंत पोहोचवल्या जाणार आहेत. विशेष म्हणजे ज्या ग्रामीण भागात आजवर मराठी चित्रपट सोहळा झालेला नाही, अशा ठिकाणी विशेष ग्राउंड कार्यक्रमांचे आयोजन केले जाणार आहे. "मराठी माणूस, मराठी भाषा, साहित्य, कलाकार आणि संस्कृतीवर माझे निस्सीम प्रेम आहे. त्यामुळे त्यांच्या हक्कांसाठी मी नेहमीच आवाज उठवत असतो," असे भावे यांनी स्पष्ट केले. त्यांनी पुढे सांगितले की, रिसर्च टीमच्या मदतीने जुन्या कलाकारांच्या आठवणी आणि किस्से गोळा करून ते प्रेक्षकांपर्यंत पोहोचवले जातात. कार्यक्रमात बिग एफएमचे सीईओ सुनील कुमारन, लोकमान्य मल्टी पर्पज को-ऑपचे झोनल प्रमुख सुशील जाधव यांच्यासह विरसिंग भोसले, संग्राम खोपडे, डॉ. आनंद देशपांडे, जयेश पाटील आणि शैलेश भंडारी उपस्थित होते. या कार्यक्रमात प्रेक्षकांना पत्रे पाठवून सहभागी होता येणार असून, मराठी चित्रपटांना पुन्हा प्रेक्षकांमध्ये रुजवण्यासाठी विशेष प्रयत्न केले जाणार आहेत.