पुण्यात घरफोड्या करणाऱ्या टोळीला पोलिसांनी पकडले:2 सराईत आरोपींकडून 12 लाखांचा मुद्देमालासह 2 पिस्तुले जप्त

पुणे शहरात कोंढवा, लोणी काळभोर हडपसर अशा विविध भागात घरफोड्या चोरी करणार्‍या टोळीतील दोन सराईत आरोपीना दोन पिस्तुलासह गुन्हे शाखेच्या युनिट सहाच्या पथकाने जेरबंद केले आहे. यावेळी चार घरफोडीचे गुन्हे उघड कराताना पथकाने 12 लाख 17 हजारांचा मुद्देमाल जप्त केला. समीर उर्फ कमांडेा हनीफ शेख (19, रा. सय्यदनगर, हडपसर, गंगानगर, फुरसुंगी) आणि यश मुकेश शेलार (20, रा. तरवडे वस्ती, महंमदवाडी, पुणे) अशी अटक करण्यात आलेल्या दोघांची नावे आहेत. युनिट सहाचे वरिष्ठ पोलिस निरीक्षक वाहिद पठाण यांच्या मार्गदर्शनाखाली फुरसुंगी पोलिस ठाण्याच्या हद्दीत पोलिस हवालदार नितीन मुंढे गस्त घालत असताना त्यांना सराईत आरोपी समीन शेख याच्याकडे दोन पिस्तुल असल्याची माहिती मिळाली. त्यानुसार त्याला ताब्यात घेण्यात आले असता त्याच्याकडून पिस्तुले जप्त करण्यात आली. त्याच्याकडील अधिक तपासात त्याला काडतुसे व पिस्तुल हे यश शेलार याने पुरविल्याचे निष्पन्न झाले. दोघांकडून एक, एक पिस्तुल जप्त करण्यात आले. पुढील तपसासाठी त्यांना पोलिस ठाण्यांकडे वर्ग करण्यात आले आहे. या कारवाईत सहायक पोलिस निरीक्षक मदन कांबळे, उपनिरीक्षक रामकृष्ण दळवी, हवालदार बाळासाहेब सकटे, रमेश मेमाणे, कानिफनाथ कारखेले, ऋषीकेश ताकवणे, सचिन पवार, समीर पिलाने यांनी सहभाग घेतला. कारच्या धडकेत दुचाकीस्वाराचा मृत्यू भरधाव कारच्या धडकेत दुचाकीस्वार तरुणाचा मृत्यू झाल्याची घटना डेक्कन जिमखाना भागातील खंडोजीबाबा चौकात घडलीविनायक साहेबराव थेटे (वय 3०, कोल्हार, भगवतीपूर, ता. राहता. जि. अहिल्यानगर) असे मयत झालेल्या दुचाकीस्वाराचे नाव आहे. याप्रकरणी कारचालकाविरुद्ध गुन्हा दाखल करण्यात आला. याबाबत विनायक यांचे काका राहुल थेटे (वय 34, रा. रहाटणी, पिंपरी-चिंचवड) यांनी डेक्कन पोलिस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार विनायक डेक्कन जिमखाना भागातील खंडोजीबाबा चौकातून निघाले होते. त्या वेळी भरधाव कारने दुचाकीस्वार विनायक यांना धडक दिली. अपघातात गंभीर जखमी झालेल्या विनायक यांना तातडीने खासगी रुग्णालयात दाखल करण्यात आले. उपचारांदरम्यान त्यांचा मृत्यू झाला. पोलिस उपनिरीक्षक दत्तात्रय सावंत तपास करत आहेत.