माढ्यासाठी भरघोस निधी आणणार

माढा : माढा मतदारसंघात मी जे विकासाचे व्हिजन मांडले आहे ते पूर्ण करण्यासाठी सरकारच्या दारात जाऊन बसेन, विनंती करेन वेळप्रसंगी पायाही पडेन मात्र मतदारसंघासाठी निधी कमी पडू देणार नाही. असे आश्वासन नवनिर्वाचित आमदार अभिजित पाटील यांनी दिले.

ते माढा येथे विजयी मिरवणूकीत आयोजित सभेत बोलत होते. आ. पाटील पुढे म्हणाले की, या भागात सिंचनाच्या योजना प्रलंबित आहेत. त्या पूर्ण करण्यासाठी प्रथमतः प्रयत्न करेन. शहरांच्या विकासाचे जे व्हिजन लोकांसमोर मांडले आहे ते पूर्ण करण्यासाठी मी कुठेही कमी पडणार नाही. मतदारसंघात ठिकठिकाणी महापुरुषांचे पुतळे उभा करणार आहे. आपल्याला दिलेला शब्द पाळण्यासाठी कायमस्वरुपी प्रयत्नशील राहीन.

माढा शहरात मतमोजणीनंतर आल्यानंतर आ. अभिजित पाटील यांनी माढेश्वरी देवीचे दर्शन घेतले. त्यानंतर त्यांची शहरात विजयी मिरवणूक काढण्यात आली. यावेळी कार्यकर्त्यांनी मोठ्या प्रमाणात जल्लोष साजरा केला. छत्रपती शिवाजी महाराज चौकात त्यांच्यावर जेसीबीमधून फुलांचा वर्षाव करण्यात आला. क्रेनच्या सहाय्याने भला मोठा हार घालून त्यांचा सत्कार करण्यात आला. यावेळी माढ्याचे माजी उपसरपंच राजाभाऊ चवरे, नगरसेवक शहाजी साठे, गुरुराज कानडे, दिनेश जगदाळे, आबासाहेब साठे, शंभूराजे साठे, ऋषीकेश तांबिले, जितेंद्र जमदाडे, दौलत साठे यांचेसह माढा शहर व पंढरपूर तालुक्यातील अनेक कार्यकर्ते मिरवणूकीत सहभागी झाले होते.