राज्यस्तरीय 'यक्षप्रश्न' स्पर्धेत पुण्याचा दबदबा:अभिनव विद्यालयाला विजेतेपद, सिटी प्राईड व भारतीय विद्याभवनला अनुक्रमे दुसरे-तिसरे स्थान

भाषा फाउंडेशनने आयोजित केलेल्या 'यक्षप्रश्न' या राज्यस्तरीय आंतरशालेय प्रश्नमंजूषा स्पर्धेत पुण्यातील शाळांनी आपला दबदबा कायम राखला आहे. पुण्यातील अभिनव विद्यालय इंग्रजी माध्यम शाळेने विजेतेपद पटकावले, तर सिटी प्राईड स्कूल, निगडी आणि भारतीय विद्याभवन परांजपे विद्यामंदिर, पुणे या शाळांनी अनुक्रमे द्वितीय व तृतीय क्रमांक मिळवला. न्यू इंग्लिश स्कूल, टिळक रोड येथील गणेश सभागृहात झालेल्या या स्पर्धेत राज्यभरातून ४० हून अधिक शाळांनी सहभाग नोंदवला. 'टेल ऑफ सिटीज' या विषयावर आधारित या स्पर्धेत इयत्ता ६ वी ते ८ वी च्या विद्यार्थ्यांनी भाग घेतला. विशेष म्हणजे पुण्याबाहेरील इचलकरंजी, सोलापूर, मुंबई येथील १० शाळांसह, सुधागड तालुक्यातील नेणवली येथील आदिवासी शाळा आणि नाशिकच्या महानॅब भावना चांडक ब्लाइंड स्कूलच्या विद्यार्थिनींनीही स्पर्धेत सहभाग नोंदवला. विजेत्या अभिनव विद्यालयाच्या संघात स्वरा भोळे, इरा जोगळेकर, नील चाफेकर आणि आराध्या देव यांचा समावेश होता. भाषा फाउंडेशनच्या संस्थापिका स्वाती राजे यांच्या म्हणण्यानुसार, गेल्या अकरा वर्षांपासून शहरी, ग्रामीण आणि दुर्गम भागातील विद्यार्थ्यांमध्ये वाचनाची आवड आणि संशोधन वृत्ती वाढावी या उद्देशाने ही स्पर्धा आयोजित केली जाते. प्रसिद्ध चित्रकार चारुहास पंडित यांच्या प्रमुख उपस्थितीत झालेल्या बक्षीस वितरण सोहळ्यात विजेत्या संघांना ट्रॉफी देण्यात आल्या. तसेच अंतिम फेरीतील सर्व स्पर्धक शाळांना त्यांच्या ग्रंथालयासाठी पुस्तके आणि सहभागी विद्यार्थ्यांना प्रशस्तिपत्रके प्रदान करण्यात आली.