लॉटरीत ‘तिने’ 20 कोटी जिंकले तरीही...

लारा सांगते की, ती आणि तिचा एक्स-हसबंड रोजर युनायटेड किंगडमच्या वेस्ट यॉर्कशायरमध्ये साधं आयुष्य जगत होते. त्याच वेळी तिने 1.8 मिलियन पाऊंड (सुमारे 20 करोड रुपये) जिंकले. परंतु, लारा ग्रिफिथ्सचा आनंद दीर्घकाळ टिकला नाही. घराला आग लागली आणि नंतर तिने नवर्‍यापासून घटस्फोट घेतल्यामुळे तिची सगळी संपत्ती नष्ट झाली. लारा म्हणते, त्यावेळी मला खरंच माहीत नव्हतं की या पैशांचं काय करावं? पैशांचं व्यवस्थापन कसं करायचं यावर रोजर आणि माझी कधी चर्चा झालीय असं आठवत नाही. त्या काळात आम्ही शानदार जीवन जगत होतो, पैसे उडवत होतो, जणूकाही उद्या कधीही येणार नाही, अशा अर्विभावातच आम्ही जगत होतो. मी नोकरी सोडली आणि दुबई, फ्लोरिडा, फ्रान्ससारख्या आकर्षक ठिकाणी फिरायला गेले. त्यांनी 1.5 लाख पाऊंड (सुमारे 1.6 करोड रुपये) किमतीचं एक ब्युटी सलून विकत घेतलं आणि 4.5 लाख पाऊंड (सुमारे 4.8 करोड रुपये) किमतीचं आलिशान घर विकत घेतलं. पण 2010 मध्ये मोठं संकट आलं, त्यांचं आलिशान घर जळून खाक झालं. लारा सांगते, ‘आमच्या घरात प्रचंड आग लागली होती. घर तीन दिवसांपर्यंत जळत राहिलं. आमची सर्व संपत्ती नष्ट झाली.’ या आगीमुळे लारा आणि तिचं कुटुंब 8 महिने होटेल्समध्ये आणि तिच्या आईकडे राहत होते. या कालावधीत तिच्या घराची दुरुस्ती सुरू होती. 2011 मध्ये लारा आणि तिच्या कुटुंबाने आपलं घर परत मिळवलं, पण त्याच्या नंतरची स्थिती अजूनही वाईट होती. काही महिन्यांनंतर रोजर आणि तिचा घटस्फोट झाला. त्या दोन वर्षांच्या काळात अगदी नरकासारखी स्थिती होती, असं ती म्हणते. तिचं हृदय तुटलं होतं, पण मुलींचं पालनपोषण करायचं होतं. 2013 मध्ये घटस्फोट होऊन लारा कंगाल झाली आणि तिला तिचं घर आणि सलून विकावं लागलं. लारा सांगते की, आग लागल्यामुळे तिच्या मुलीच्या मनावर मोठा परिणाम झाला, आणि ती अनेक वेळा बेचैन असायची. लारा स्वतःही आजारी होती, पण मुलींच्या काळजीसाठी तिने संघर्ष सोडला नाही. आजही लारा आपल्या मुली रुबी (वय 20) आणि किट्टी (वय 17) यांच्यासोबत राहते. लॉटरी जिंकून सर्व संघर्षांचा सामना करूनही लारा म्हणते, आता मला माझं जीवन आवडतं. हो, मी काही खूप कठीण काळातून गेले, पण मला त्याचं वाईट वाटत नाही!