शिंदेसेनेच्या कोट्यातील "एसटी’चे अध्यक्षपद दिले परिवहन सचिवांकडे:लोकप्रतिनिधींना टाळल्याने वाद शक्य

महायुती सरकारमध्ये २०१४ पासून एसटी महामंडळाचा अध्यक्षपदाचा कारभार परिवहनमंत्र्यांकडे दिला जातो. त्याप्रमाणे परिवहनमंत्री प्रताप सरनाईक यांचा महामंडळाच्या अध्यक्षपदाचा प्रस्ताव मुख्यमंत्र्यांकडे पाठवण्यात आला होता. एसटी फायद्यात आणण्यासाठीच्या उपाययोजना सरनाईक यांनी सुरू केल्या होत्या. मात्र, बुधवारी रात्रीतून मुख्यमंत्री देवेंद्र फडणवीस यांनी एक अध्यादेश काढून एकनाथ शिंदे गटाच्या शिवसेनेला झटका देत एसटी महामंडळाच्या अध्यक्षपदावर अतिरिक्त मुख्य सचिव संजय सेठीची नियुक्ती केल्याने महायुतीमधील फडणवीस -शिंदे यांच्यात पुन्हा एकदा वादाची ठिणगी पडली आहे. २०१४ मध्ये तत्कालीन परिवहनमंत्री दिवाकर रावते, अनिल परब यांच्याकडे एसटी महामंडळाचे अध्यक्षपद होते. त्यानंतर २०२४ मध्ये भरत गोगावले यांना अध्यक्षपदाची जबाबदारी दिली होती. मात्र, गोगावले कॅबिनेट मंत्री झाल्यानंतर त्यांना एसटी महामंडळाचा राजीनामा द्यावा लागला. सिडकोचे अध्यक्षपद संजय शिरसाट यांना देण्यात आले होते. मात्र, त्यांनाही नंतर सिडकोचा राजीनामा द्यावा लागला. एसटी महामंडळ प्रचलित पद्धतीनुनार महायुतीमधील एकनाथ शिंदेंच्या पक्षाचे परिवहनमंत्री प्रताप सरनाईक यांना मिळेल असा अंदाज होता. मात्र, फडणवीस यांनी नवी खेळी करत थेट अध्यक्षपदावर अतिरिक्त मुख्य सचिवांचीच नेमणूक केल्याने महायुतीमधील संघर्ष अधिक गडद होत आहे. एकनाथ शिंदे यांच्या १३१० बसेस भाडेतत्त्वावर घेण्याचा निर्णय केला होता रद्द शिंदे यांनी १३१० बसेस भाडेतत्त्वावर घेण्याचा निर्णय घेतला. फडणवीस मुख्यमंत्री होताच त्यांनी या िर्णयाची चौकशी लावून निविदाच रद्द केली. परिवहनमंत्री सरनाईक यांनी सूत्रे हाती घेताच एसटी महामंडळाच्या जागा विकसित करण्याचा निर्णय घेतला. एकाच संस्थेला १०० जागा देण्याचा प्रयत्न सुरू होता. त्यासाठी ४ बैठका घेण्यात आल्या असून त्यांचे मिनिट्स काढण्यासाठी प्रशासनावर दबाव आणण्यात आला. त्यामुळेच फडणवीस यांनी सूत्रे अतिरिक्त मुख्य सचिवांच्या हाती दिल्याचे बोलले जात आहे. संजय सेठी यांची नियुक्ती तात्पुरती महामंडळाच्या तीनही पक्षाला नियुक्त्या करायच्या आहेत. तीनही पक्षाच्या नियुक्त्या होईपर्यंत कोणाला तरी त्या जागेवर बसवायचे आहे. नंतर मंत्र्यांकडून ते पद काढा आणि दुसऱ्यांना द्या, म्हणून अतिरिक्त मुख्य सचिवांची नियुक्ती केली आहे. शेवटी परिवहनमंत्री म्हणून माझ्यावर एसटी महामंडळाची जबाबदारी आहेच. एसटी महामंडळाचे अध्यक्षपद राजकीय असल्याने ही तात्पुरती नियुक्ती सेठी यांची केली आहे. पुढे महामंडळाच्या राजकीय नेत्यांच्या नियुक्त्या झाल्या तर आपोआप अध्यक्षपदावर राजकीय नेतृत्व येईल. पुढेही अध्यक्षपद राजकीय नेत्यालाच मिळेल, मात्र ते महायुतीमध्ये कोणत्या पक्षाला मिळेल हे बघावे लागेल. यासंदर्भात अद्याप मुख्यमंत्र्यांना भेटलो नाही. तीन पक्षांची समिती याबाबत निर्णय घेईल. - प्रताप सरनाईक, मंत्री, परिवहन १९८५ पूर्वी सनदी अधिकारी अध्यक्ष एसटी महामंडळाच्या स्थापनेला ७६ वर्षे पूर्ण झाली आहेत. या काळामध्ये सुमारे १९८५ च्या दरम्यान सनदी अधिकाऱ्यांनाच एसटी महामंडळाचे अध्यक्ष म्हणून नियुक्त केले जायचे. दरम्यानच्या काळामध्ये सर्वात शेवटचे सनदी अधिकारी अध्यक्ष म्हणून ३८ न. वे. सुंदरामन हे पूर्णवेळ एसटी महामंडळाचे अध्यक्ष होते. त्यानंतर मात्र राजकीय नेत्यांना अशासकीय पद्धतीने अध्यक्षपदावर नियुक्तीचा धोरणात्मक निर्णय घेण्यात आला होता. त्यानंतर २०१४ ते २०२४ या काळामध्ये पुन्हा बदल करून परिवहनमंत्र्यांकडे एसटी महामंडळाच्या अध्यक्षपदाचा कारभार दिला जात होता. २०२४ मध्ये एकनाथ शिंदे यांच्या शिवसेनेचे भरत गोगावले यांना विधानसभा निवडणुकीपूर्वी स्वतंत्र अध्यक्ष केले होते. मात्र, आता पुन्हा एकदा त्यामध्ये बदल करून सनदी अधिकाऱ्याला एसटी महामंडळाचे अध्यक्षपद दिले.