दुचाकीवरून नेताना महिलेचा अपघाती मृत्यू:साडीचा पदर चाकात अडकल्याने झाला अपघात; आरोपी बांधकाम व्यावसायिकाला अटक

पुण्यात एका धक्कादायक घटनेत ३२ वर्षीय विवाहित महिलेचा दुचाकी अपघातात मृत्यू झाला. २५ वर्षीय बांधकाम व्यावसायिक महिलेला दुचाकीवरून नेत असताना तिच्या साडीचा पदर मागील चाकाच्या चैनमध्ये अडकला आणि तिचे डोके रस्त्यावर आपटून तिचा जागीच मृत्यू झाला. याबाबत मयत महिलेच्या ४० वर्षीय पतीने उत्तमनगर पोलिसांकडे आरोपी विरोधात फिर्याद दाखल केली आहे. सदरचा प्रकार सन २०२१ ते आतापर्यंत घडलेला आहे. पाेलिसांनी दिलेल्या माहितीनुसार, संबंधित तक्रारदार याच्या पत्नीचे आरोपी तरुणासोबत सन २०२१ पासून अनैतिक संबंध हाेते. महिलेची आर्थिक परिस्थिती बिकट असल्याचे माहिती असल्याने आरोपीने तिच्याशी जवळीक साधत तिच्या परिस्थितीचा गैरफायदा घेत तिची इच्छा नसताना तिला वेगवेगळे अमिष दाखवून फुस लावून वारंवार तिच्याशी जबरदस्तीने शारिरिक संबंध केले. आराेपी हा त्याच्या दुचाकीवर महिलेस लाॅजवरुन पुन्हा घरी घेऊन जात असताना, तिच्या साडीचा पदर हा दुचाकीच्या पाठीमागील चाकाच्या चैन मध्ये अडकून तिचे डाेके रस्त्यावर जाेरात आपटल्याने तिचा अपघात हाेऊन दुर्देवी मृत्यु झाला. तिचे मृत्युस कारणीभूत ठरुनही त्याबाबतची माहिती आरोपीने महिलेचे कुटुंबीय किंवा पाेलिसांना दिली नाही. याबाबत पुढील तपास काेथरुड विभागाचे सहाय्यक पोलिस आयुक्त भाऊसाहेब पटारे करत आहे. ऑनलाइन ओळख झालेल्या मुलीवर बलात्कार खडकी परिसरात राहणाऱ्या १५ वर्षीय मुलीसोबत फ्री गेमच्या माध्यमातून एका तरुणाची ओळख निर्माण झाली होती. सदर ओळखीच्या माध्यमातून तरुणाने तिच्याशी जवळीक निर्माण करत तिला लग्नाचे अमिष दाखवून तिच्यासोबत शारिरिक संबंध करुन तिला गरोदर करणेस कारणीभूत झाला आहे. याप्रकरणी आरोपीवर खडकी पोलिस ठाण्यात बलात्काराचा व पाेक्साे कायद्यानुसार गुन्हा दाखल करण्यात आला आहे.