देवगाव रंगारीजवळ अज्ञात वाहनाच्या धडकेत एक ठार:मार्गावरील वर्षभरात गेला सतरावा बळी‎

छत्रपती संभाजीनगर-नाशिक महामार्गावरील देवगाव रंगारीजवळ अज्ञात भरधाव वाहनाच्या धडकेत एक दुचाकीस्वार जागीच ठार झाल्याची घटना मंगळवार, २६ रोजी रात्री दहा ते अकरा वाजेदरम्यान घडली. या घटनेची माहिती मिळताच देवगाव रंगारी पोलिसांनी घटनास्थळी धाव घेऊन मृत व्यक्तीस ग्रामस्थांच्या मदतीने येथील ग्रामीण रुग्णालयात दाखल केले असता वैद्यकीय अधिकाऱ्यांनी त्यास मृत घोषित केले. दरम्यान, मृत व्यक्तीची ओळख पटली असून तो वैजापूर तालुक्यातील बाभूळगाव येथील विठ्ठल अण्णा तुपे (३५) असल्याचे कळाले. या प्रकरणी देवगाव रंगारी पोलिस ठाण्यात अज्ञात वाहनाच्या विरोधात गुन्हा नोंदवण्यात आला आहे. याबाबत अधिक माहिती अशी की, विठ्ठल अण्णा तुपे (रा. बाभूळगाव, ता. वैजापूर) हे छत्रपती संभाजीनगर येथून खासगी काम करून गावी बाभूळगाव येथे रात्री दहा ते अकरा वाजेदरम्यान दुचाकीवरून (महा २० जीडब्ल्यू ३०५१) एकटे परत येत असताना संभाजीनगर-नाशिक महामार्गावरील देवगाव रंगारीजवळील हॉटेल पंचवटीपासून ५०० फूट अंतरावर पाठीमागून येणाऱ्या भरधाव अज्ञात वाहनाने दुचाकीस जोरदार धडक दिल्याने विठ्ठल अण्णा तुपे यांच्या डोक्याला जबर मार लागल्याने ते जागीच ठार झाले. या अपघातात अज्ञात वाहन फरार झाले. याबाबत माहिती मिळताच पोलिसांसह परिसरातील सतीश करडे, हनिफ शेख, कार्तिक चोथरे, विकास ठोंबरे यांनी घटनास्थळी धाव घेऊन विठ्ठल यांना रुग्णालयात दाखल केले होते.