पिंपळनेर : खतांच्या तुटवड्यामुळे शेतकरी त्रस्त; कृषी विभागाचा अनागोंदी कारभार

पिंपळनेर,जि.धुळे : साक्री तालुक्यात रब्बी हंगामाच्या सुरवातीलाच बाजारातून डीएपी आणि एनपीके-10:26 ही दोन्ही खते अचानक गायब झाल्याने शेतकऱ्यांच्या तोंडचे पाणी पळाले आहे. त्यासोबतच खतांच्या खरेदीवेळी विक्रेत्यांकडून दुय्यम खते माथी मारली जात असल्याची ओरड सुरू आहे. अशी अनागोंदी सुरू असतानाच कृषी विभागाकडून कोणतेच ठोस नियोजन नसल्याची परिस्थिती जाणवत आहे.

गेल्या महिनाभरापासून डीएपी व 10:26 चा स्टॉक मिळाला नसल्याने खते विक्रेत्यांची पंचाईत झाली आहे. शेतकऱ्यांमध्ये गैरसमज पसरवून त्यांना बोगस खतांचा देखील पुरवठा करण्यात येतो. शासनाने लवकरात लवकर स्टॉक उपलब्ध करून द्यावा. रासायनिक खत कंपन्यांनी लिंकिंगची सक्ती थांबवून सुरळीत पुरवठा करणे आवश्यक आहे. पिंपळनेर, दहीवेल, निजामपूर सर्व साक्री तालुक्यातील, कृषी विक्रेता संघटनांना या त्रासाला सामोरे जावे लागत आहे. शहरी आणि ग्रामीण भागातील कृषीसेवा केंद्रात शेतकऱ्यांना मुख्य खते घ्यायची असतील तर त्यासोबत इतर दुय्यम खतेही घ्यावी लागतील, अशी सक्ती केली जाते. परंतु त्यात दुकानदारांची देखील पिळवणूक होते आहे. त्यांना खते कंपनी तशा प्रकारची सक्ती करीत असतात म्हणून दुकानदारांना शेतकऱ्यांना तशा पद्धतीने विक्री करणे नाईलाज ठरतो, त्यामुळेच इच्छा नसतांना देखील विक्रेत्यांकडून तर बियाणे, खते आणि दुय्यम खते असे पॅकेज घेण्याची सक्ती केली जाते. अधिकारी नेहमी सूचित करीत असतात की, खते लिंकिंग करू नका, असा इशारा विक्रेत्यांना दिला जातो. मात्र आम्हाला कंपन्यांनी टार्गेट दिले आहे, त्यामुळे लिंकिंगशिवाय पर्याय नाही, असे समर्थन खते विक्रेत्यांकडून करण्यात येते.

शेतकऱ्यांकडून असे बोलले जात आहे की, कृषी विभागाकडून अनागोंदी कारभार सुरु असल्यामुळे कृषी विभागाने रब्बीच्या नियोजनाकडे दुर्लक्ष केल्याची ओरड होत आहे. केवळ औपचारिकता कोणत्या विक्रेत्याकडे किती स्टॉक आहे याची माहिती अपडेट केली जात नाही. शिल्लक खतसाठ्याची माहिती नियमित दिल्यास कृषी विक्रेते आणि शेतकऱ्यांमध्ये वाद उद्भवणार नाहीत.