पुण्यात कोयताधारी टोळक्यांचा धुमाकूळ:धनकवडीत तरुणावर जीवघेणा हल्ला; बिबवेवाडीत 30 वाहनांची तोडफोड

पुण्यातील कायदा व सुव्यवस्थेचा प्रश्न ऐरणीवर आला असून, कोयताधारी टोळक्यांकडून सलग दोन ठिकाणी हिंसक घटना घडल्या आहेत. धनकवडी परिसरातील गणेशनगर येथे पूर्ववैमनस्यातून करण रामचंद्र शिवतरे या तरुणावर टोळक्याने कोयत्याने जीवघेणे वार केले. प्रेम चव्हाण, नान्या सावंत, संदेश नायर आणि त्यांच्या ३-४ साथीदारांनी जुन्या भांडणाच्या कारणावरून करण याच्या डोक्यावर, छातीवर, हात व पायांवर वार करून त्याला गंभीर जखमी केले. याप्रकरणी आरोपी प्रेम चव्हाण, नान्या सावंत, संदेश नायर व त्यांचे तीन ते चार साथीदार यांचेवर सहकारनगर पोलिस ठाण्यात गुन्हा दाखल करण्यात आला आहे. याबाबत तरुणाचे वडील रामचंद्र नामदेव शिवतारे (वय- ६२) यांनी आरोपी विरोधात पोलिसांकडे फिर्याद दिली आहे. तक्रारदार यांचा मुलका करण हा त्याच्या मित्रांसाेबत घराजवळ गप्पा मारत बसलेला असताना, आरोपींनी जुने भांडणाचे कारणावरुन त्यांच्या हातातील लोखंडी धारदार कोयत्याने करण याचे डाेक्यावर, छातीवर तसेच दाेन्ही हात व पायांवर वार करुन त्यास जीवे ठार मारण्याच्या उद्देशाने गंभीर जखमी केले आहे. त्यास उपचारासाठी रुग्णालयात दाखल करण्यात आले आहे. दरम्यान, घटनेची माहिती मिळताच, वरिष्ठ पोलिस अधिकाऱ्यांनी घटनास्थळी धाव घेत, परिस्थितीची पाहणी करत पसार झालेल्या आरोपींचा शाेध सुरु केला. याबाबत पुढील तपास सहकारनगर पोलिस ठाण्याच्या पोलिस निरीक्षक (गुन्हे) सुरेखा चव्हाण करत आहे. वाहन ताेडफाेडवेळी तरुणावर हल्ला बिबवेवाडी परिसरात अप्पर डेपाे येथे तीनजणांच्या टोळक्याने रस्त्यावर पार्क करण्यात आलेल्या ३० ते ४० वाहनांची ताेडफाेड केल्याचा प्रकार घडला हाेता. याप्रकरणी तीन आरोपींवर बिबवेवाडी पोलिस ठाण्यात गुन्हा दाखल करण्यात आला आहे. सदर आरोपींच्या वाहन ताेडफाेडवेळी गाडीत झाेपलेले फैजान इकबाल तासीलदार (वय- २४) यांचे गाडीवर आरोपींनी कोयत्याने हल्ला करुन गाडीच्या काचा फाेडल्या. ते गाडीतून उतरण्याचा प्रयत्न करत असताना आरोपींनी कोयत्याने त्यांच्यावर वार केला. तसेच तक्रारदार यांचे डाेक्याचे दिशेने आरोपींनी वार करुन त्यांना जीवे ठार मारण्याचा प्रयत्न केल्याचा दुसरा गुन्हा पोलिसांकडून दाखल करण्यात आला आहे.