राष्ट्रवादीचे हिंगोलीत युवा जोडो अभियान:ग्रामीण भागातील तरुणांनाही अभियानात सहभागी करून घेण्याचे जिल्हाध्यक्ष बांगर यांचे आवाहन

हिंगोली जिल्ह्यात राष्ट्रवादीच्या वतीने (अजित पवार गट) युवा जोडो अभियान राबविले जाणार असून या अभियानात शहरी भागासोबतच ग्रामीण भागातील तरुणांना सहभागी करुन घेण्याचे आवाहन राष्ट्रवादीचे जिल्हाध्यक्ष बी. डी. बांगर यांनी वसमत येथे केले. वसमत राष्ट्रवादीच्या पदाधिकारी व कार्यकर्त्यांचा मेळावा रविवारी ता. २ पार पडला. यावेळी आमदार राजेश नवघरे, रामदास पाटील सुमठाणकर, माजी जिल्हा परिषद सदस्य संजय दराडे, गौतम दवणे, बाळू मामा ढोरे, जिजा हरणे यांच्यासह पदाधिकारी व कार्यकर्त्यांची मोठ्या संख्येने उपस्थिती होती. यावेळी जिल्हाध्यक्ष बांगर यांनी मार्गदर्शन केले. पालकमंत्री नरहरी झिरवाळ, राष्ट्रवादीचे आमदार राजेश नवघरे व इतर आमदारांच्या माध्यमातून हिंगोली जिल्ह्याच्या विकासासाठी शासन दरबारी पाठपुरावा केला जाणार आहे. आगामी काळात युवा जोडो अभियानातून तरुणांचे मोठे संघटन करून जिल्ह्यातील प्रत्येक गावातील समस्यांची माहिती घेतली जाईल. तसेच गावपातळीवर असलेले प्रश्‍न सोडविण्यासाठी लोकप्रतिनिधीच्या माध्यमातून प्रयत्न केले जाणार आहेत. त्यासाठी राष्ट्रवादीच्या सर्वच पदाधिकाऱ्यांनी आपापल्या गावातील प्रश्‍न, समस्यांची माहिती देणे आवश्‍यक आहे. या शिवाय युवकांच्या प्रश्‍नावरही शासनाकडे पाठपुरावा केला जाणार असल्याचे त्यांनी स्पष्ट केले. हिंगोली जिल्हयात आगामी काळात युवा जोडो अभियानाच्या माध्यमातून युवकांना जोडले जाईल. त्यासाठी पदाधिकारी व कार्यकर्त्यांनी शहरी भागासोबतच ग्रामीण भागातील युवकांना या अभियानात सहभागी करून घ्यावे. तसेच गावपातळीवर सदस्य नोंदणी करण्याचे आवाहन त्यांनी केले. ता. ९ फेब्रुवारी रोजी राष्ट्रवादीचे युवक प्रदेशाध्यक्ष सुरज चव्हाण यांच्या उपस्थितीत वसमत येथे युवक मेळाव्याचे आयोजन केले आहे. या मेळाव्यात जास्तीत जास्त युवकांनी उपस्थित राहण्याचे आवाहन जिल्हाध्यक्ष बी. डी. बांगर यांनी यावेळी केले.