समृद्धी महामार्गावर भीषण अपघात:चालकाला झोप लागल्याने कार दुभाजकाला धडकली; महिलेचा मृत्यू, 5 जण जखमी

नागपूर येथील लग्नसमारंभानंतर मूर्तिजापूरला परतताना समृद्धी महामार्गावर भीषण अपघात झाला. चालकाला डुलकी लागल्याने कार रस्त्याच्या दुभाजकाला धडकली. या अपघातात ६७ वर्षीय आशादेवी रमेशचंद्र लाहोटी यांचा मृत्यू झाला, तर अन्य पाच जण गंभीर जखमी झाले. घटनेची माहिती अशी की, लाहोटी कुटुंबीय नागपुरातील लग्नसोहळा आटोपून सोमवारी रात्री ११ वाजता मूर्तिजापूरकडे निघाले होते. कार (एमएच ३७, व्ही ४३३३) रोहित रमेशचंद्र लाहोटी (३६) चालवत होता. कारमध्ये त्याची आई आशादेवी लाहोटी, पत्नी तिलक लाहोटी (३२), भाऊ रोशन लाहोटी (३५) आणि मूर्तिजापूरचे नातेवाईक दिनेश मोहनलाल मालानी (३८) व सुनिता मालानी (३३) हे प्रवास करत होते. मध्यरात्री हिंगणा पोलीस ठाणे हद्दीतील समृद्धी महामार्ग सर्कलजवळील वेणा नदी परिसरात चालक रोहितला डुलकी लागली. जाग आल्यावर त्याने कार नियंत्रित करण्याचा प्रयत्न केला, मात्र कार दुभाजकाला जोरदार धडकली. मागून येणाऱ्या वाहनचालकांनी जखमींना एम्स रुग्णालयात दाखल केले. उपचारादरम्यान आशादेवी यांचा मृत्यू झाला. या प्रकरणी जावई विठ्ठल राठी यांच्या तक्रारीवरून कार चालक रोहित लाहोटी याच्याविरुद्ध कलम १०६(१), २८१, १२५(ब), भान्यासं सहकलम १८४ मोटार वाहन कायद्यानुसार गुन्हा दाखल करण्यात आला आहे.