वैभव नाईक यांच्यासह पत्नी स्नेहा यांना एसीबीची नोटीस, 11 फेब्रुवारीला हजर राहण्याची सूचना

शिवसेनेचे माजी आमदार वैभव नाईक यांच्या मालमत्तेच्या अनुषंगाने लाचलुचपत प्रतिबंधक विभागाकडून चौकशी सुरू आहे. याप्रकरणी  जबाब नोंदविण्यासाठी त्यांना व त्यांची पत्नी स्नेहा नाईक यांना एसीबी कार्यालय, रत्नागिरी येथे 11 फेब्रुवारी रोजी उपस्थित राहण्याबाबत पत्र पाठविण्यात आले आहे.

लाचलुचपत प्रतिबंधक विभागाने दिलेल्या पत्रात प्रतिबंधक कार्यालयाकडून सुरू असलेल्या उघड चौकशीच्या अनुषंगाने 5 डिसेंबर 2022 रोजी आपण पत्नीसह उपस्थित होता, मात्र लोकप्रतिनिधी कालावधीतील आपली मालमत्ता, उत्पन्न व खर्च याबाबत परिपूर्ण माहिती त्या वेळी उपलब्ध नसल्याचे सांगितले होते. ती माहिती आपण नंतर सादर करणार असल्याचे सांगितले होते. त्यामुळे त्या वेळी प्राथमिक स्वरूपात आपला जबाब नोंदविण्यात आला होता. त्यानंतर चौकशीच्या अनुषंगाने मालमत्ता व दायित्वाचे 1 ते 6 फॉर्ममधील माहिती व आवश्यक कागदपत्रांसह अनुक्रमे 3 जानेवारी 2023 रोजी आणि 28 जून 2023 रोजी उपस्थित राहण्याबाबत आपणास या कार्यालयाकडून कळविण्यात आले होते. मात्र आपण उपस्थित न राहता 28 जून 2023 रोजी आपले अकाऊंटंट अमोल केरकर हे उपस्थित राहिले. मात्र त्यांनी आणलेली कागदपत्रे परिपूर्ण नसल्याने ती न देता काही कालावधीनंतर आपल्या उपस्थितीत सदरची कादगपत्रे हजर करू, असे पत्र त्यांनी एसीबी कार्यालयास दिले असल्याचे नाईक यांनी स्पष्ट केले.

वैभव नाईक आणि त्यांची पत्नी स्नेहा यांचे तसेच एच.यू. एफ व नाईक स्टोन इंडस्ट्रीज यांचे 1 जानेवारी 2002 ते 29 सप्टेंबर 2022 या कालावधीतील उत्पन्न, खर्च व मालमत्ता याबाबतची आवश्यक ती माहिती आपणास एसीबी कार्यालयाकडून देण्यात आलेल्या मत्ता व दायित्वाचे 1 ते 6 फॉर्ममध्ये नमूद करण्याविषयी सांगण्यात आले. तसेच सदर कालावधीतील आयकर विवरणपत्रे, ऑडीट रिपोर्ट, कॉम्प्युटेशन ऑफ इनकम, शेडय़ुल बॅलन्सशीट, प्रॉफीट अॅन्ड लॉस अकाऊंट डिटेल्स शेडय़ुल व त्यासंबधीत कागदपत्रांसह 11 फेब्रुवारी  रोजी सकाळी 11 वाजता पोलीस उपअधीक्षक, लाचलुचपत प्रतिबंधक विभाग, रत्नागिरी कार्यालय येथे उपस्थित राहण्याविषयी सांगण्यात आले आहे.

दबाव कितीही आला तरी दमणार नाही!

एसीबीच्या तगाद्याबाबत बोलताना वैभव नाईक म्हणाले की, मागील दोन-तीन वर्षांपासून लाचलुचपत विभागाकडून माझी चौकशी सुरू आहे. त्यांना लागलेली माहिती मी देत होतो, परंतु काल पुन्हा एकदा मला आणि माझ्या पत्नीला नोटीस मिळाली आहे. आता निवडणुका झाल्यात, त्यांना राजकीय दबाव आणायचा असेल तर ते आणू शकतात. दबाव कितीही आला तरी दमणार नाही एवढे नक्की! तसेच अन्य पक्षांतून कोणत्याही ऑफर नाहीत आणि अशा ऑफर स्वीकारणार नाही.