सेनगाव पंचायत समितीमधील कपातीच्या रकमेची अनियमितता 25 लाखांवर:व्हॉवचरवर बनावट स्वाक्षऱ्या केल्याचा संशय

सेनगाव पंचायत समितीमधील कपातीच्या रकमेची अनियमितता 25 लाखांवर पोहोचली असून अद्यापही चौकशीचे काम सुरुच आहे. त्यानंतर आता व्हॉवचरवरील स्वाक्षऱ्या बनावट असल्याचा संशय व्यक्त केला जात असून तपास पथकाने बँकांकडे व्हॉवचरची मागणीही केली आहे. त्यामुळे स्वाक्षऱ्या बनावट आढळून आल्यास फसवणुकीचा गुन्हा दाखल करण्याची तयारी जिल्हा परिषदेने चालवली आहे. सेनगाव पंचायत समितीमध्ये सन 2018-19 ते सन 2022-23 या आर्थिक वर्षातील कपातीच्या रकमांची चौकशी केली जात आहे. यामध्ये कंत्राटदारांकडून कपात केलेली कराची रक्कम, कामगारांची रक्कम संबंधित विभागाच्या बँक खात्यावर जमा न होता वैयक्तिक बँक खात्यावर जमा करण्यात आली आहे. या प्रकरणात जिल्हा परिषदेच्या मुख्यकार्यकारी अधिकारी नेहा भोसले, जिल्हा परिषदेचे मुख्य लेखा व वित्त अधिकारी दिगंबर माडे यांनी चार जणांचे स्वतंत्र चौकशी पथक स्थापन करून या रकमांची चौकशी सुरु केली आहे. या चौकशीमध्ये बँकांना देण्यात आलेले धनादेश, बँकांकडून वैयक्तिक खात्यात जमा झालेले धनादेश याची माहिती घेतली जात आहे. आता पर्यंत तब्बल 25 लाख रुपयांची अनिमितता झाल्याचे प्राथमिक चौकशीमध्ये स्पष्ट झाले आहे. विशेष म्हणजे यामध्ये काही कर्मचाऱ्यांनी त्यांच्या बँक खात्यातच धनादेश जमा केले असून या शिवाय इतर विभागाच्या कर्मचाऱ्यांच्या नावे रकमा जमा केल्याचे दिसून येत आहे. त्यामुळे या प्रकरणाची सखोल चौकशी केली जात आहे. विशेष म्हणजे बँकांना देण्यात आलेले धनादेश व त्या सोबत देण्यात आलेले व्हॉवचर यावर एकाच अधिकाऱ्यांच्या स्वाक्षऱ्या असणे आवश्‍यक आहे. मात्र धनादेशावर असलेल्या स्वाक्षऱ्या व व्हॉवचरवरील स्वाक्षऱ्या यामध्ये तफावत आढळून येत असल्याचे सुत्रांनी सांगितले. त्यामुळे चौकशी पथकाने बँकांना पत्र देऊन व्हॉवचरची मागणी केली आहे. या व्हॉवचरची तपसाणी केल्यानंतरच खरा प्रकार स्पष्ट होणार आहे. दरम्यान, धनादेशावर असलेल्या अधिकाऱ्यांच्या स्वाक्षऱ्या व व्हॉवचरवर असलेल्या स्वाक्षऱ्या यामध्ये तफावत आढळून आल्यास त्याचीही चौकशी करून दोषींवर फसवणुकीचा गुन्हा दाखल करण्याची तयारी जिल्हा परिषदेने चालवली आहे.